Venezuela: Corte Supremo Mericano ta rechasa revisa fayo cu ta permiti subasta di Citgo

(NTN24) – Corte Supremo di Merca dialuna ultimo a rechasa revisa un fayo hudicial cu ta autorisa e benta di accionnan di Citgo, filial di e petrolero estatal Venezolano, Pdvsa na Merca controla pa opositornan, segun AFP.

Cirgo ta un di e activonan cu oposicion Venezolano ta controla pa decision di Merca, cu ta sigui considera legitimo e Parlamento eligi na 2015, a pesar cu su legislatura a termina na 2021.

Algun empresa tin sentencia cu ta otorga nan derecho pa apropia di e accionnan di Citgo pa compensa expropiacionnan di gobierno di Nicolas Maduro.

“Certiorati nenga” ta bisa den e documento publica pa Corte Supremo, den e apartado cu ta recoge e caso di Venezuela y otronan contra OI European Group BV y otronan.

E certiorati ta un recurso legal cu ta permiti un partido solicita pa un tribunal superior revisa e caso y determina si a comete algun eror. E directiva ad hoc di Venezuela tabata kier pa Corte Supremo revisa e fayo emiti pa un hues di Tercer Circuito cu a duna luz berde na e benta di accionnan di Citgo.

Riba e red social X, economista Francisco Rodriguez, profesor di Universidad di Denver, a calcula cu “e perdida di Citgo ta un ehemplo mas den cual tanto Maduro como oposicion tradicional a incuri den maneho cuestionable, causando perdidanan patrimonial grave na e nacion.”

E demandanan di e acreedornan contra Citgo ta supera 20mil miyon dollar. Esaki ta haci cu “un negociacion cu e acreedornan ta inviable den ausencia di un acuerdo politico,” e economista ta agrega.

Dialuna tambe na Houston un hues a duna fayo na fabor di un grupo di 10 acreedor cu a dicidi di uni e embargo di e compania petrolero. E tribunal ta “designa tur acreedor cu te na e fecha, a obtene un auto di embargo (…) condicional of incondicional contra e accionnan di PDVH, propiedad di Pdvsa (…) como acreedornan adicional di e sentencia,” segun e fayo ta bisa.

PDVH ta e accionista indirecto di Citgo.

E tension entre Caracas y Washington, cu ta considera e reeleccion di Maduro na 2018 como fraudulento, ta parce di a alivia den ultimo lunanan. Tambe tin un cierto relahacion palpable entre e mandatario socialista y oposicion, cu cual na october a firma e acuerdo di Barbados tocante eleccion presidencial na 2024.