(AP) — Un atake aereo Israeli a mata un comandante elite di Hezbollah ayera den sur di Lebanon, e accion mas recien den un intercambio di atake a traves di e frontera cu a eleva miedo di otro guera den Medio Oriente mientras e bataya na Gaza ta cobra un cantidad di bida civil.
E atake riba un SUV a mata un comandante den un unidad secretivo di Hezbollah cu ta opera na e ofrentera, segun un oficial Libanes kende a papia anonimo.
E comandante a bringa pa e grupo durante decadas y a participa den algun di su batayanan mas grandi.
Wissam al-Tawil, 48, un comandante den e secretivo Forsa Radwan di Hezbollah desplega riba e frontera cu Israel, a muri na momento cu e atake a dal su SUV na su ciudad natal, Khirbet Silem. E atake tabata como 10 kilometer leu di e frontera, leu di e pueblonan cu tabata testigo di e intercambio di e atake entre e dos bandanan durante ultimo tres luna.
Pa simannan largo, oficialnan Israeli tabata exigiendo pa e Forsa Radwan retira for di area di frontera pa permiti diesmiles di Israelitanan desplasa pa e bringamento pa bolbe na hogar. Durante un bishita na Israel luna pasa, consehero di seguridad nacional Mericano, Jake Sullivan a bisa cu e “resultado negocia” lo ta e miho manera pa duna siguransa na residentenan di nort di Israel.
Al-Tawil, kende a join Hezbollah na 1989, tabata e oficial di rango mas halto den e grupo cu a ser mata desde e intercambio di atake na e frontera Libanon-Israel, cu a cuminsa despues di e atake di Hamas, un aliado di Hezbollah, na sur di Israel dia 7 di october ultimo.
Despues cu e guera Israel-Hamas a cuminsa tres luna pasa, al-Tawil a comanda algun “operacion special” contra postnan Israeli na e frontera, segun un declaracion di Hezbollah.
Un oficial di Hezbollah a bisa Associated Press cu al-Tawil tabatin un rol den impulsa e guera di berano na 2006 cu Israel y a bringa den e guera civil di Siria, unda e tabata a cargo di coordina entre e grupo Libanes y ehercito Sirio den e batayanan contra e grupo Estado Islamico.
Dia 12 di juli 2006, al-Tawil tabata miembro di un unidad special di Hezbollah cu a drenta Israel, captura dos soldad Israeli y a mata otronan, dunando inicio na un pelea di un luna cu Israel cu a mata 1,200 persona na Libanon y 160 na Israel, segun e oficial, kende a papia di forma anonimo.
Añanan despues, ora Hezbollah a join e guera na Siria na 2013, batayando hunto cu forsanan di gobierno Sirio, al-Tawil tabata un aliado cercano di hefe comandante di Hezbollah eynan, Mustafa Badreddine, kende a ser mata na 2016, segun e oficial.
Al-Tawil, kende su dos ruman homber a ser mata bringando cu Hezbollah, a participa den decenas di atake contra forsanan Israeli y nan aliadonan Libanes durante e 18 aña di ocupacion Israeli den sur di Libano te cu a retira na aña 2000.
Durante su añanan largo cu e grupo, al-Tawil tabata cercano di Imad Mughniyeh, hefe militar di Hezbollah desde fundacion di e grupo na 1982 te cu el a ser mata cu bom den capital Sirio na 2008. Al-Tawil tambe tabatin lasonan cercano cu General Qassem Soleimani, cabesante di Forsa Quds di Iran, kende a ser mata cu drone Mericano na Baghdad, na 2020.
