Diabierna atardi varios polis di diferente departamento a presenta na un adres na Sabana Basora Noord pa un entrada oficial na un adres y a detene un sospechoso.

Noticieronan local a busca informacion via tur canal pero ta asumi cu lo ta esnan cu ta hortando autonan Kia recientemente.

Informacion for di canalnan oficial no ta accesible te ainda, ta spera cu apenas cu esaki ta disponible por comparti esaki cu nos lectornan.

Kia Boyz Challenge

Siman pasa, Bon Dia Aruba a hala atencion pa e “challenge” riba e red social TikTok conoci como ‘Kia Boyz Challenge’.

Recientemente por a mira riba diferente suceso unda cierto persona ta horta autonan di un marca specifico y cu esaki tin relacion cu un challenge di TikTok.

Na Savaneta, diaranson ultimo algun medionan local a logra reporta e hortamento di un auto marca KIA, ora Polis a topa cu e auto a cuminsa cu un persecucion y na final, autoridad a logra detene un di e personanan aki, otronan a logra di huy for di e luga y Polis a confisca e auto.

Tambe na Bushiri un otro persecucion a tuma luga cu e mesun marca di auto y na unda e sospechosonan tambe a logra di huy.

Loke ta hala atencion den diferente caso di hortamento recien ta cu mayoria di e autonan ta marca KIA.

Investigando riba internet, den e website di noticia EFE a publica cu esaki ta forma parti di un supuesto challenge cu tin algun tempo caba riba e red social Tik Tok cu ta yama “Kia Boyz Challenge.”

Esaki a cuminsa na october 2023 na e ciudad di Chicago, na momento cu a presenta un demanda contra e marcanan Hyundai y KIA acusando nan di exagera e medidanan anti-robo a pesar cu nan no tabata conta cu sistema avansa di seguridad. Esaki a provoca un epidemia di hortamento na e ciudad, cu a bira pio debi na e apariencia di e challenge riba Tik Tok.

E demanda ta acusa e dos compania fabricante Sur Koreano di no instala “tecnologia anti-robo vital” den e autonan cu nan a bende entre 2011 y 2022, segun e ciudad di Chicago, Hyundai y KIA “a gaña e consumidornan bisando cu nan tabatin medidanan di seguridad avansa, conociendo e defecto aki y su consecuencianan”.

E demanda aki ta tuma luga despues di un serie di video cu a publica riba rednan social unda ta revela con facil por supera e sistema anti robo di e autonan Hyundai y KIA. Riba e videonan por mira con por cende e auto cu un USB conecta na e sistema di e auto.

E personanan cu tabata comete e robonan aki, ta denomina como “KIA Boyz” y nan a haci e fayo di siguridad aki viral como parti di un challenge, yama “KIA Challenge.”

For di e momento ey, autoridadnan di Chicago a indica cu e number di hortamento di autonan Hyundai y KIA na e ciudad a pasa di cerca di 500 den e prome mita di 2022 pa 8.350 na segundo mita di aña.

Na mei di aña pasa, e dos fabricante di auto aki a yega na un acuerdo pa resolve un demanda na nivel nacional pa falta di inmobilisador y otro sistema anti robo den 9 miyon auto aproximadamente cu a ser bendi entre 2011 y 2022.

Challenge na Aruba

No a tarda hopi pa e challenge aki yega Aruba, causando consternacion y problema pa doñonan di auto marca KIA, cu medionan local reportando cu e autonan aki ta esnan horta mas frecuentemente.

Den un reciente articulo publica pa Bon Dia Aruba ta señala cu delincuentenan ta den un racha di hortamento di tanto auto como brommer. Apenas algun siman pasa un minimo di cinco persona a haci publicacion den buskeda di nan auto horta.

Ciudadanonan ta comenta ariba e publicacionnan aki y ta vocifera nan preocupacion y ta puntra ta kico ta pasando y unda e autoridadnan local.

“Dicon tin tanto auto cu ta wordo horta? Kico ta pasando? Tin un gang cu ta hopi activo y tin un racha di horta auto. Unda polis a keda? Dicon no ta haci nada of no ta sali bisa nada,” un usuario a comenta.

Algun usuario ta remarca tambe cu ta e mesun marca di auto cu ta wordo horta frecuentemente. Ariba esaki un otro usuario a comenta: “Esaki ta e mesun ladron cu ta hortando e Kianan. Polis no ta pensa di haci un investigacion?”

Mientras tanto otro ta indica cu e delincuentenan aki ta horta e autonan, specialmente e marca popular, pa desmantela e auto completamente y bende e piesanan. P’esey mes hopi biaha e autonan aki no ta aparece y si nan aparece mes, nan no ta den bon condicion of ta falta piesanan importante.

Hopi ciudadano ta tumando accion di prevencion den nan man y asina nan wak personanan sospechoso no conoci canando den nan bario nan ta alerta otro cuidadonan di e mesun bario a traves di rednan social pa nan ta pendiente y tene cuenta pa nan no pasa den mesun situacion fastioso aki.

Autoridadnan ainda no a confirma si e caso aki ta relaciona cu e hortamento di autonan marca KIA.