Despues cu Fundacion Savaneta Aruba a cuminsa cu e proyecto Kwasha di Curason e cual ta trata di un campaña oficial pa verf casnan di antaño na Savaneta pa asina nan por bira un atraccion turistico, e vision di e fundacion ta birando un realidad manera nan ta sigura.

Cu e obhetivo di mustra na turistanan a balornan cultural di Aruba, e fundacion aki na 2024 ta bay sigui traha den aña 2024 pa asina preserva identidad Arubiano y promove esakinan pa e bishitantenan cu ta bin.

Mediante un publicacion riba nan rednan social, por tuma nota cu un bus di un compania di tours masha reconoci a haci un stop pa asina turistanan por baha for di e bus pa saca potret di e cas ubica na Savaneta #64, e cual ta e prome cas cu nan a verf cu e campaña Kwasha di Curason.

“Savaneta tin un historia largo y sigur nos tradicion y cultura ta un aspecto importante awendia den industria turistico.” Nan ta sigura.

Desde cu e Spañonan a conkista e isla di Aruba 1499 te cu 1636 Savaneta tabata e centro di operacion y na 1636 cu e Hulandesnan a tuma over Aruba Savaneta tabata e prome capital di Aruba di 1636 te 1797. Despues di 1797 capital di Aruba a bira Oranjestad.

Definicion di un capital ta unda e centro di poder ta ubica y no necesario e cantidad di habitantenan. Na Savaneta tabata ubica e Commandeur cu tabata raporta directo na W.I.C y Rey y tabata usa e Commandeurs Baai pa asunto di barco y comercio. Aruba a ser colonisa pa West Indisch Compagnie pues na 1636 den final di e guera di 80 aña di Hulanda y Spaña y tabata mas bien un isla parti di Corsou cu tabata isla mas grandi cu mas desaroyo y na Aruba mas bien tabata tin cria di bestia y cabay y tambe agricultura pa manda Corsou den tempo di Peter Stuyvesant aña 1642.

Awendia e fundacion aki ta señala cu no a resta nada tangibel di e era como prome capital excepto algun graf di e prome Commandeursnan pero si tin na Savaneta ainda e parti canto di lama di Commandeursbaai unda e piscadonan ainda ta sali tur dia f’ey e boca en busca di porvenir. Savaneta desde 1499 a conoce cambio di su habitantenan for di indjannan te cu un mix di Europeo cu a bin establece y awe tin comunidad distinto na Savaneta cu un pasado largo pero tambe un futuro prometedor. Esey ta si awe den presente ta preserva e balornan cultural historico.

Potret cortesia di Facebook page di Fundacion Savaneta Aruba.