Recientemente mediante un comunicado di prensa Prome Minister Evelyn Wever-Croes a reitira e atencion di Gobierno di Aruba pa mehoracion di e aparato gubernamental. El a remarca cu aña 2024 ta un aña importante pa restructuracion di e aparato gubernamental di pais Aruba.

Prome Minister a indica cu desde inicio di Gabinete Wever-Croes, gobierno a señala cu e aparato gubernamental di pais Aruba mester haya mas atencion, y mester introduci cambionan, entre otro cambionan di digitalisacion. E meta di e cambionan aki, el a enfatisa, ta pa mehora e servicio na ciudadanonan di pais Aruba, y pa trece mas transparencia den e procesonan pa asina tur hende sa kico e procesonan ta. “Esaki lo baha e grado di riesgo pa corupcion tambe,” el a indica den e comunicado.

Manera ta conoci den aña 2022 a cuminsa e trabounan preparatorio, y den 2023 e estudio a inicia pa restructura e aparato gubernamental, pa haci e aparato uno mas agil, mas eficiente, mas transparente y mas confiabel.

E transformacion di aparato gubernamental tambe lo encera ahustacion di e leynan actual. Na mesun momento lo concentra riba e comunicacion efectivo pa e cambionan, pa crea sosten y asina atende cu posibel preocupacionnan di empleadonan publico cu por tin preocupacion pa e consecuencianan di esaki.

E prome parti di e proceso lo ta pa re evalua tur e tareanan cu gobierno ta ehecuta pa dicidi cual ta e tareanan cu gobierno mester sigui ehecuta, y cual tareanan ya no ta cay bao di nan. Lo propone tambe si mester independisa departamentonan, lo pone atencion riba trabounan cu ta wordo haci dobel den gobierno pa diferente departamento y por ultimo lo pone atencion na e tareanan cu gobierno mester ta ehecutando pero cu no ta haciendo ainda.

Prome Minister a informa cu den cuadro di Landspakket, den colaboracion cu Hulanda, e compania Price Waterhouse Coopers di Hulanda a gana e destaho, ya a cuminsa cu entrevistanan den tur departamento di Gobierno. E pregunta cu lo wordo contesta den e estudio aki ta: cual ta e tareanan cu ta wordo haci awor den gobierno, cu mester wordo haci pa gobierno, y cualnan no. Tambe: cual ta e tareanan cu NO ta wordo haci den gobierno awor, pero mester wordo haci pa gobierno.

E conclusionnan di e estudio aki y e recomendacionnan lo wordo entrega na april di e aña aki y a base di e recomendacionnan cu sali di e estudio gobierno lo tuma decision di cual ta e cambionan structural cu lo wordo ehecuta riba termino corto, y cualnan mester mas tempo di preparacion.

“Nos ta ansioso pa haya e conclusionnan di e estudio aki, pa asina por restructura e aparato gubernamental. Hunto cu e trayecto di e-Government, lo mehora e servicio na comunidad visiblemente. Esey tabata nos compromiso desde cu mi a drenta den Gobierno. Lamentablemente e pandemia mundial Covid-19 a stroba hopi di e plannan, pero awor lo cuminsa mira e resultadonan,” Prome Minister a bisa.

El a subraya cu nan no ta premira cu empleadonan publico lo perde trabou, mirando e escasez grandi cu tin den practicamente tur departamento di Gobierno. “Importante ta cu nos ta prepara e aparato gubernamental pa por sirbi e necesidadnan di Aruba pa nos futuro generacionnan por realisa nan soñonan”, el a agrega.

Pa loke ta e tema di e-governemnt, durante tratando di presupuesto 2024 den luna di december ultimo, Prome Minister a contesta pregunta tocante e tema aki y el a splica cu den aña 2024 Aruba ta bay ricibi e prome tranche di e placa cu Union Europeo a aproba pa e proyecto di e-government.

El a sigui splica cu Union Europeo a aproba 14 miyon euro pa e proyecto di e-government y Aruba lo ricibi esaki den un periodo di tres pa cuater aña.

El a agrega cu den 2024 gobierno ta bay enfoca riba e plan cu a wordo entrega na UE, e vision local y con nan ta bay ancra esaki den Aruba su legislacion.

Prome Minister a resalta cu un di e puntonan di salida pa loke ta specificamente e proyecto di e-government ta inclusion. El a splica cu tin un programa special pa yuda esnan cu no tin acceso na computer of cu no tin e capacidad of cu tin miedo pa usa un computer, pa guia nan pa asina nan no bira victima di digitalisacion.

E tema di integridad tambe ta un topico cu ta ser cuestiona hopi ora cu ta trata e aparato gubernamental. Den luna di september ultimo parlamentario lider di fraccion Accion 21 den Parlamento di Aruba, Miguel Mansur, a dirigi un carta na Prome Minister di Aruba den cual e ta manda preguntanan por escrito cuestionando e integridad den e aparato gubernamental.

Parlamentario Mansur a acerca Prome Minister, como e minister encarga cu asuntonan di personal di gobierno y bao cual Departamento di Recurso Humano (DRH) ta resorta, pa trece pa dilanti su preocupacion pa loke ta un supuesto situacion delicado cu ta toca e tema di integridad den e aparato gubernamental.

El a referi na un circulario ‘maatregelen tegen niet-integer gedrag’ (medidanan contra comportamento no etico) di dia 18 juli 2023, DRH no. 59787, 995/23, cu a wordo firma pa Prome Minister.

Mansur ta remarca cu den e circulario aki hopi poder ta ser otorga na e director di DRH den cuadro di accionnan disciplinario y tambe pa loke ta trata atende cu comportamento di trahadonan publico cu no ta ser considera no integro.

El a indica cu fraccion Accion21 a mira diferente declaracion cu a ser entrega contra DRH, incluyendo contra e actual director, pa actonan cu aparentemente ta contra ley y cu no ta cuadra cu un maneho integro.

Cuestionando e integridad di e aparato gubernamental, e parlamentario di fraccion Accion21 a manda un serie di pregunta pa Prome Minister pa asina por tin claridad ariba e situacion aki.

Den un intento pa mehora e team di integridad y transparencia, y cumpli cu e deber di gobierno di informa pueblo activamente tocante nan maneho, pa mehora y hisa e nivel di Transparencia Activo den gobernacion, minister di Integridad, Ursell Arends, a anuncia e lansamento di e proyecto piloto http://Publico.aw. caminda ciudadanonan por haya informacion gubernamental na un forma accesibel y innovativo.

E meta di Ministerio di Integridad segun a sigura ta pa sigui desaroya e plataforma aki y continuamente aumenta e cantidad y tipo di informacion, di tur ministerio, na un forma structural, riba e website regularmente lo tin updates y mas informacion.

E esfuersonan di Ministerio di Integridad pa promove transparencia ta parti di un enfoke mas amplio riba gobernacion efectivo y participativo.