Mediante un comunicado pa prensa, ayera Ministerio Publico y Cuerpo Policial di Aruba a informa cu polis ta bay ristra preventivamente durante actividadnan di Carnaval na Oranjestad y San Nicolas riba posesion ilegal di arma di candela.
Pa loke ta trata districto di Playa nan ta bay ristra preventivamente durante Fakkel (6 y 7 januari), Carnaval di mucha (28 januari), Lighting Parade (3 y 4 februari) y Parada Grandi (11 februari).
Na San Nicolas lo ta durante Jouvert Morning (2 y 3 februari), Carnaval di mucha (4 februari), Parada di luz (7 y 8 februari) y Parada Grandi (10 februari).
Den cuadro di e accion polis ta autorisa pa para tur hende y ristra nan paña, pidi pa habri tasnan y pakinan y busca den nan, y busca den auto y otro vehiculonan pa arma di candela illegal. Polis ta wordo autorisa pa haci esaki dor di hues-comisario riba peticion di Ministerio Publico.
Durante Fakkel na Oranjestad ta bay ristra preventivamente: desde 7pm di dia 6 januari 2024 te pa 7am di 7 januari 2024.
Carnaval di Mucha Oranjestad riba 28 januari 2024 di 12am te 12pm.
Lighting Oranjestad riba 3 februari 2024 desde 7pm te 4 februari 2024 pa 7am.
Parada Grandi Oranjestad riba 11 februari 2024 di 11am te 11pm.
Durante Jouvert Morning na San Nicolas dia 2 di februari 2024 desde 10pm te 3 di februari 2024 pa 10am.
Carnaval di Mucha San Nicolas riba 4 februari 2024 di 12am te 12pm.
Parada di luz San Nicolas dia 7 di februari 2024 desde 7pm te 8 februari 2024 pa 7am.
Parada Grandi San Nicolas riba 10 februari 2024 di 11am te 11pm.
Cuerpo Policial Aruba preparando pa e ultimo detayenan pa awe pa cu e Parada di Fakkel, den esaki diferente departamento di Cuerpo Policial a reuni hunto cu Comisario Sra. Irma Gordon cu ta encarga cu Carnaval 70.
Nan a haci un apelacion pa tur hende comporta y cumpli cu ordo di polis, tambe ta bay tin controlnan prome durante y despues di parada, manera nan a informa.
Riba rednan social por mira diferente anuncio di Cuerpo di Polis hibando aviso di conscientisacion pa loke ta trata Faya Bo Haya y/of Ristramento Preventivo, indicando cu si un persona kier bringa, tira boter, no kier sigui orden di polis, ta maneha bao influencia y ta burachi y causa problema, ademas di otro actonan e personanan lo haya multa of ta bay cera.
Aña pasa, nan a produci un total di 11.400 florin di multa cu 19 detencion den e parada di Flambeu segun loke autoridadnan a informa. Potret ta cortesia di Facebook page di Cuerpo di Polis.
Ana pasa
