Mediante un comunicado pa prensa, Cuerpo Policial di Aruba a informa cu diahuebs ultimo den oranan di anochi pa 18:57 central di polis a ser informa di un caso na unda cu un persona lo mester a ser maltrata pabao di Bushiribana.
Segun mas autoridadnan, e persona maltrata tabata den un di e trail cu ta ser usa pa ciclistanan.
Central a despacha patruya y tambe e helicopter di polis pa asina cuminsa cu un buskeda pa cu e persona.
Despues di un rato e helicopter di polis a localisa e persona hende homber, nan a guia e patruya pa por yega na sitio na unda e persona tabata ubica.
Patruya a haya e persona hende homber y a transporta e victima na altura di Matividiri pa asina personal di ambulance por a dun’e tratamento medico y despues pa transport’e pa hospital.
E prome informe ta cu segun e victima e lo a ser maltrata pa 4 homber bisti full na preto y probablemente nan lo kier a cende na candela.
Recherche a bay na e sitio como tambe polis tecnico pa asina cuminsa cu e investigacion.
Cuerpo Policial ta haci un apelacion es cu sa algo of a wak algo yama e tiplijn di polis cu ta 11141. Anonimidad ta keda garantisa.
