“Kia Boyz Challenge” di Tik Tok tin atencion di autoridadnan y doñonan di auto

Polis ta bin trahando duro den dianan aki pa loke ta trata hortamento di auto y pa logra gara esnan cu ta comete e acto aki ya cu recientemente por a mira riba diferente suceso cu cierto personanan ta horta autonan di un marca specifico y cu esaki tin relacion cu un challenge di e red social “Tik Tok.”

Na Savaneta, diaranson ultimo algun medionan local a logra reporta e hortamento di un auto marca KIA, ora Polis a topa cu e auto a cuminsa cu un persecucion y na final, autoridad a logra detene un di e personanan aki, otronan a logra di huy for di e luga y Polis a confisca e auto.

Tambe na Bushiri un otro persecucion a tuma luga cu e mesun marca di auto y na unda e sospechosonan tambe a logra di huy.

E fenomeno aki di hortamento di auto a bira un tendencia den ultimo dianan na unda riba rednan social por mira cantidad di denuncia di hendenan cu nan auto a ser horta, e parti mas curioso di e tendencia aki ta cu e mayoria di e autonan ta di marca KIA.

Investigando riba internet, den e website di noticianan EFE a sali publica cu esaki ta forma parti di un supuesto challenge cu tin algun tempo caba riba e red social Tik Tok cu ta yama “Kia Boyz Challenge” na unda cu for di october 2023 ciudad di Chicago a presenta un demanda contra e marcanan Hyundai y KIA acusando nan di exagera e medidanan anti robo, a pesar cu nan no tabata conta cu sistema avansa di siguridad, loke a provoca un epidemia di hortamento na e ciudad, cu a bira pio debi na challenge riba Tik Tok.

E demanda ta acusa e dos compania fabricante sur Koreano di no instala “tecnologia anti robo vital” den e autonan cu nan a bende entre 2011 y 2022, segun e ciudad di Chicago, Hyundai y KIA “a gaña e consumidornan bisando cu nan tabatin medidanan di siguridad avansa, conociendo e defecto aki y su consecuencianan”.

E demanda aki ta tuma luga despues di un serie di videonan cu a ser publica riba rednan social unda ta revela con facil por supera e sistema anti robo di e autonan Hyundai y KIA, den videonan por mira con por cende e auto cu un USB conecta na e sistema di e auto.

E personanan cu tabata comete e robonan aki, ta denomina como “KIA Boyz” y nan a haci e fayo di siguridad aki viral como parti di un challenge, yama “KIA Challenge.”

For di e momento ey, autoridadnan di Chicago a indica cu e number di hortamento di autonan Hyundai y KIA na e ciudad a pasa di cerca di 500 den e prome mita di 2022 pa 8.350 na segundo mita di aña.

Na mei di aña pasa, e dos fabricante di auto aki a yega na un acuerdo pa resolve un demanda na nivel nacional pa falta di inmobilisador y otro sistema anti robo den 9 miyon auto aproximadamente cu a ser bendi entre 2011 y 2022.

Awor e challenge aki ta poniendo di cabes autoridadnan y specificamente e doñonan di auto KIA cu ta esun di mas horta den temporada aki segun loke medionan local ta reporta, loke ta hala mas atencion den e casonan aki ta cu ta trata di hobennan cu a wak un challenge riba red social y a dicidi di haciel’e sin importa e consecuencianan cu esaki ta trece cune.

Den un reciente articulo publica pa Bon Dia Aruba ta señala cu delincuentenan ta den un racha di hortamento di tanto auto como brommer. Apenas 2 siman pasa un minimo di cinco persona a haci publicacion den buskeda di nan auto cu a ser horta.

Ciudadanonan ta comenta ariba e publicacionnan aki y ta vocifera nan preocupacion y ta puntra ta kico ta pasando y unda e autoridadnan local.

“Dicon tin tanto auto cu ta wordo horta? Kico ta pasando? Tin un gang cu ta hopi activo y tin un racha di horta auto. Unda polis a keda? Dicon no ta haci nada of no ta sali bisa nada,” un usuario a comenta.

Algun usuario ta remarca tambe cu ta e mesun marca di auto cu ta wordo horta frecuentemente. Ariba esaki un otro usuario a comenta: “Esaki ta e mesun ladron cu ta hortando e Kianan. Polis no ta pensa di haci un investigacion?”

Mientras tanto otro ta indica cu e delincuentenan aki ta horta e autonan, specialmente e marca popular, pa desmantela e auto completamente y bende e piesanan. P’esey mes hopi biaha e autonan aki no ta aparece y si nan aparece mes, nan no ta den bon condicion of ta falta piesanan importante.

Hopi ciudadano ta tumando accion di prevencion den nan man y asina nan wak personanan sospechoso no conoci canando den nan bario nan ta alerta otro cuidadonan di e mesun bario a traves di rednan social pa nan ta pendiente y tene cuenta pa nan no pasa den mesun situacion fastioso aki.

Te ainda ningun comunicado ni informacion a wordo publica of comparti for di KPA informando comunidad di e racha aki, si por a compronde cu recherchenan ta trahando den investigacion y autonan cu ta ser horta y rescata back ta wordo tuma den beslag pa autoridadnan.