Mediante un publicacion haci ayera mainta pa Cuerpo Policial Aruba, nan a informa cu te ayera nan no a saca ningun timeframe pa cu e parada di Fakkel pa Carnaval 70 cu lo tuma luga diasabra 6 januari 2024.
Nan a sigura cu Cuerpo Policial a tuma nota cu ta circulando un timeframe bieu di Carnaval 69 y manera e timeframe pa Fakkel Carnaval 70 ta cla , nan lo publica esaki riba nan rednan social, di mesun manera nan ta haci un suplica pa tene cuenta cu esaki.
Carnaval 70 ta on, temporada di Pasco y Fin di Aña a yega na su fin, un aña nobo a cuminsa y esaki ta trece cune Aruba su famoso temporada di Carnaval. E aña aki Aruba ta celebra su di 70 Carnaval y ya caba e preparacionnan final ta tumando luga diasabra ta cende e mecha di Carnaval cu parada di flambeu, miho conoci como fakkel.
E aña aki e temporada di carnaval ta bastante cortico mirando cu ya dia 12 di februari parada grandi di Aruba su Carnaval ta tuma luga. For di momento cu Carnaval a finalisa aña pasa, gruponan a anuncia nan temanan pa e aña aki y inscripcionnan a habri pa e diferente paradanan y e diferente competencianan y eleccionnan di reina.
Gruponan di Carnaval a sold out den tempo record y tin algun cu tin luga ainda, pero cual sea ta e caso, e ultimo preparacionnan ta den full swing y diasabra 6 di januari fakkel ta cuminsa cu e ambiente pa pueblo di Aruba por disfruta di un otro temporada di Carnaval, un fiesta cultural.
Dia 11 di november 2023, 11/11, manera ta custumber y tradicion, e apertura oficial pa Carnaval 70 a tuma luga y e siman prome ya caba pre-finalnan di Aruba Caiso y Soca Monarch a tuma luga.
En conexion cu e di 70 celebracion di Carnaval, Stichting Maneho di Aruba su Carnaval (SMAC) ta dedica Carnaval 70 na e 60 añanan di Carnaval organisa pa Stichting Arubaanse Carnaval (SAC).
