Diahuebs mainta durante un conferencia di prensa, Gestor Cultural Mirto Laclé conhuntamente cu Biblioteca Nacional Aruba y Departamento di Cultura Aruba a anuncia un evento di un anochi cu un programa multidisciplinario cu ta hiba e nomber ‘Pa Un Bon Comienso di Aña 2024.’
E anochi, Lacle a indica, lo consisti di un programa cu actividadnan integra, musica, canto, baile, charla y presentacion y ta bay tin como invitadonan special lo tin Mr. Joyce Overdijk-Francis, ilustrado Vanessa Paulina, Sra. Paula Engelen y Grupo di Dande.
El a splica cu Sra. Joyce Overdijk-Francis lo elabora ariba algun aspecto, manera entre otro, e tempo colonial y desaroyonan di Structura Estatal, sclavitud trans-atlantico/middle passage, resistencia, libertad, reconocimento, e historia comun y museo di sclavitud.
Sra. Vanessa Paulina lo presenta su trabou como ilustrado di e buki Virginia, E Rebelde
di Aruba. E buki aki ta conta e storia di Virginia, e rebelde di Aruba y con e ta lucha pa
su libertad y ta resisti contra opresion di su doño.
E obra Virginia, E Rebelde di Aruba a keda produci pa escritor Jeroen Hoogerwerf y
ilustrado Vanessa Paulina den cooperacion cu UNOCA y Biblioteca Nacional
Aruba.
Sra. Paula Engelen lo duna un presentacion di e diferente shownan cultural
musical cu el a yega di presenta como MC, Host, organisador di evento y PR di musica, y particularmente di e musica di famia Connor en general.
Ta bay tin tambe presentacion di Grupo di Dande y Rey y Reina di Dande 2023.
