(ElNacional) – Opositornan di Venezuela a reitera diaranson nan yamado na e anti-chavismo politico y ciudadano pa lucha den unidad y cu compromiso pa logra derota e oficialismo den eleccion presidencial, premira pa e di dos semester di e aña aki.
“Lucha den unidad pa finalmente nos tin condicionnan pa un eleccion liber, husto y verificabel, pa votonan por conta y ta un mecanismo berdadero di cambio politico y no un instrumento pa consolida e dictadura. Esey ta e clave,” ex-diputado Delsa Solorzano a bisa den un mensahe riba su cuenta di red social X (antes Twitter).
Di su banda, ex-gobernador Andres Velaszquez a señala, ariba e mesun red social, cu e victoria dilanti gobierno di Nicolas Maduro, cual el a cualifica manera un regimen criminal, ta bay depende di e compromiso y esfuerso di tur Venezolano.
Velasquez a reitera su respaldo na Maria Corina Machado, candidato di coalicion opositor principal den eleccion presidencial di 2024 y ariba ken ta pisa un inhabilitacion pa ocupa cargonan publico di eleccion popular, door di cual, si no lanta e sancion, e no lo por participa den eleccion.
Dialuna ultimo, Machado a compromete su mes, mediante un mensahe ariba su rednan social, pa haci tur cos posible den e negociacion compleho cu, el a sigura, ta wordo hiba pa dilanti cu gobierno pa e eleccion presidencial, cu meta pa e interes comun di e poblacion ta semper na prome luga.
Ademas el a pidi e ciudadanonan crea nan propio comandonan di campaña pa e proceso electoral y pone nan capacidad- y recursonan na servicio di e liberacion y transformacion di e pais, loke por wordo logra, el a sigura, a traves di eleccionnan liber y limpi.
Machado a pidi na december na Tribunal Supremo de Justicia (TSJ) revisa su inhabilitacion, haciendo uso di e mecanismo acorda entre gobierno di Nicolas Maduro y opositor Plataforma Unitaria Democratica (PUD) den marco di e negociacionnan politico cu ambos banda ta mantene, pa eleccion presidencial.
