E siman aki, den medionan di comunicacion Venezolano a hala atencion e asunto di botonan clandestino cu ta nabega pa yega Aruba. Varios medio a informa cu a reforsa patruyahe na estado Falcon, unda mayoria di biahe clandestino cu destino Aruba ta cuminsa.
Segun un articulo di website lanacionweb.com, gobiernonan di Venezuela, Aruba y Corsou a acorda pa reforsa e patruyahe fluvial di manera conhunto contra e “zarpe”nan ilegal, segun e secretario di Seguridad Ciudadano di Estado Falcon, Miguel Morales a informa.
Na Falcon, unda mayoria di salidanan clandestino aki riba boto ilegal ta tuma lugar dirigi pa organisacionnan criminal, ta bay reforsa vigilancia y patruyahe cu e obhetivo pa evita embarcacionnan clandestino cu destino Aruba.
“Esnan cu insisti den realisa e accionnan aki cu ta pone den riesgo e bida di hopi ciudadano ta bay enfrenta henter e peso di ley,” segun Morales a sigura den e articulo.
Alabes ta nota cu gobierno di Aruba recientemente a anuncia cu e barconan ta bay keda deteni riba lama y no ta bay ricibi asilo. Esaki basa riba declaracionnan di minister di Husticia, Rocco Tjon, luna pasa. E articulo ta destaca si cu mayoria di ciudadano Venezolano cu ta purba yega Aruba ta di menos recurso.
Den ultimo simannan, varios embarcacion a keda intercepta riba lama, prome cu nan a logra subi tera.
