Enfocando semper riba e importancia di industrianan creativo y artistico, aña 2023 tabata uno di hopi creatividad y di hopi reto pa Go Cultura Foundation cu a bin poniendo enfasis riba con por crea mas y empodera mas e sector aki cu ta hopi esencial tanto pa artistanan mes como pa esnan cu ta interesa di participa den dje.

December tabata un luna cu hopi movecion pa e fundacion aki cu conciertonan y tradicion unda nan a organisa hunto cu Ministerio y Departamento di Cultura di Aruba, UNOCA y SETAR un “Paranda Nacional di Dande” riba Trailer cu pa dos dia di december, specificamente diabierna 29 y diasabra 30, Edjean Semeleer acompaña di otro musiconan como por ehemplo ganado di Crioyo di Oro di 2022 Sra. Maybelline Arends- Croes ken tabata presente, ademas di cantantenan di Dande cu a deleita tur esnan cu tabata na SABA di San Nicolas, Carnival Village, Centro di Bario Brazil, Parking di Club Estrella, Club Kibrahacha, Centro di Bario Dakota, Centro Deportivo Frans Figaroa y finalmente na SETAR Irausquinplain.

Ay Nobe! A ser scucha caminda un cantidad di hende a acerca y hasta a sigui trailer e den dos dia aki hibando e tradicion di Aruba su Fin di Aña cu a ser aprecia como un “bunita gesto” “un bon iniciativa” y sigur algo masha hopi gusta pa nos grandinan.

Pa e motibo aki, Go Cultura Foundation a dicidi di crea un encuesta pa asina ey e publico por comparti nan experiencia cu e “Paranda Nacional di Dande” riba Trailer, e intencion tambe ta pa scucha mas reaccion si den caso lo kier sigui wak e paranda aki pa otro aña of si tin cu haci algun ahuste.

Entre e preguntanan di e encuesta ta ki otro localidad por recomenda pa e proximo “Paranda Nacional di Dande Riba Trailer”, si ta di acuerdo pa e paranda lo haya su derecho di existencia, na ki otro caminda e paranda tambe por ta presente y si e ubicacion unda nan a presenta tabata bon y cerca di cas.

Tambe por a mira riba rednan social diferente reaccion di usuarionan cu a expresa nan opinion tocante e actividad aki unda a yega di bisa “Pabien ainda pa tur esnan cu a contribui pa haci esaki posibel, un bunita idea y cu por bira un bunita custumber,” “Esaki mester bira tur aña awor padilanti. Ay nobe, Nos Dande Nos Cultura y Tradicion!”

Go Cultura Foundation ta un fundacion crea na 2017 pa duna un protagonismo mas grandi na industrianan cultural y creativo na Aruba, na luna di mey nan a realisa varios sesion informativo dirigi na tur artista, creativo, empresario cultural, empresario creativo y tur cu ta forma parti di Aruba su industrianan cultural y creativo, na unda e interes y entusiasmo tabata hopi halto pa e sesionnan aki.

Durante e encuentronan aki, nan ta presenta algun proyecto specifico di Go Cultura cu ta andando y tambe nan ta propone na esnan presente pa asina fortifica y empodera otronan mas a traves di algun iniciativa concreto. Asina ey nan ta activa y desaroya Aruba su Industrianan Cultural y Creativo (CCIs).

Den esaki, tambe ta bay papia tocante empleonan futuro potencial den industria, training pa entrepreneur creativo cu ta contribui na creacion di mas trabou y innovacion, industrianan creativo ta motor clave di crecemento economico manera e fundacion ta enfatisa.

Tabata 21 di april di aña pasa, e dia cu nan a conmemora e Dia Mundial di Creatividad y Innovacion, den cual nan a organisa un otro encuentro interactivo cu artista, creativo, educador, empresarionan cultural y creativo di Aruba, cu pa varios motibo nan ta considera e encuentronan aki esencial, pa por ehemplo:

E sesionnan aki ta brinda un plataforma na esnan presente pa comparti nan experiencia, ideanan y desafionan den e industria. E sesionnan di Fundacion Go Cultura ta yuda nos señala y identifica problemanan comun y e necesidad di desaroyo di solucionnan y strategianan pa adresa nan.

Na di dos luga, sesionnan aki ta yuda den crea mas relacionnan y “netwerknan” den e industria. Esaki por conduci na colaboracion y aliansanan cu por ta beneficioso pa artista y creativonan individualmente y pa e industria den su totalidad.

Di tres, e sesionnan aki ta yuda eleva consciencia di e importancia di e industrianan aki (CCIs) pa e comunidad en general.

Finalmente, door di demostra e trabou di artista y creativonan y enfatisa e beneficionan economico y social di e industria, e sesionnan aki ta crea sosten pa e sector y sigur lo yega na stimula inversion y mas fondo pa realisacion di proyecto.

Durante e sesionnan di Fundacion Go Cultura, mescos cu combersacionnan cu varios persona den e sector pa e ultimo 5 añanan, nan ta keda descubri varios reto comun.

Esakinan ta inclui problemanan relaciona cu fondonan, acceso na recursonan y infrastructura, derecho di propiedad intelectual, y e necesidad di reconocemento y sosten for di varios stakeholder.

A pesar di e desafionan aki, nan ta contento di a ripara un entusiasmo y motivacion pa por traha hunto pa mehoracion. Esaki ta pa motibo cu hopi individuo den e industrianan aki ta pasiona tocante nan trabao y mas y mas ta compronde e impacto y potencial cu e industria tin riba cultura, sociedad y economia.

Pa nan ta importante pa continua cu e sesionnan informativo ya cu nan a hay’e como un oportunidad valioso pa sostene desaroyo y crecemento di e industria, nan ta sigura cu nan ta comprometi pa crea un ecosistema mas sostenibel y vibrante pa artista y creativonan prospera. Pa cu esaki tambe nan a presenta un proyecto concreto di investigacion pa por finalmente demostra cu data y evidencia e desafionan, balor y tambe potencial di e industrianan aki.