(AP)—Rusia a lansa un record di 90 drone den henter Ucrania durante e prome oranan di aña nobo, y presidente Ruso Vladimir Putin a bisa cu su pais lo “instensifica” su atake riba su bisiña.
Papiando durante un bishita di aña nobo na un hospital militar, Putin a bisa cu Ucrania por anticipa mas atake asina despues di bombardia e ciudad frontera Belgorod cu a mata mas cu 25 hende y a herida 100 otro. “Nan kier intimida nos y crea inciertud dentro di nos pais. Nos lo intensifica atakenan. Ningun crimen contra nos poblacion civil lo bay sin castigo,” manera e lider Ruso a bisa, describiendo e bombardeo di Belgorod como un “acto di terorismo.”
Rusia a tira culpa riba Ucrania pa e atake diasabra, cual tabatin un di e atakenan mas fatal cu a tuma luga riba tera Ruso desde e invasion di Rusia riba Ucrania, cual a cuminsa 22 luna pasa. Oficialnan Ruso a bisa cu e conteo di morto ta para na 25 desde dialuna, incluyendo cinco mucha chikito.
Ciudadnan dentro di e parti west di Rusia regularmente ta enfrenta atakenan di drone desde mei, aunke oficialnan Ucrania nunca a reconoce responsabilidad pa e atakenan riba teritorio Ruso of den e Peninsula Crimea.
Putin a acusa nacionnan den west di uza Ucrania pa purba “pone Rusia na su luga.” Mientras cu el a priminti retribucion, el a insisti cu Rusia lo solamente atake infrastructura militar na Ucrania. “Claro, nos por ataca sitionan publico den Kyiv y den cualkier otro ciudadnan Ucranio,” el a bisa. “Mi ta compronde—mi ta yena cu rabia—pero nos mester ataca civilnan? No. Nos ta atacando obhetonan militar, y esey ta kico nos ta bay keda haci.”
Ambos Ucrania y Rusia a depende extensivamente riba dronenan explosivo durante e guera. Eola di atake Ruso riba Ucrania a continua henter e dia dialuna. Den e ciudad di Lviv, atakenan Ruso a trece dañonan severo na un museo dedica na Roman Shukhevych, un nacionalista y comandante militar Ucraniano, ken a bringa pa independencia Ucraniano durante e Segunda Guera Mundial. Edificionan di universidadnan den e pueblo di Dubliany tambe a haya daño, aunke no a reporta ningun hende herida.
Skirbiendo riba red social, alcalde di Lviv,Andriy Sadovyi, a describi e atakenan como “un guera pa nos historia” cu tabata “simbolico y cinico.” Mientras tanto, cuatro hende a muri y 13 otro a keda herida despues di e bombardeo di Ucrania riba areanan ocupa pa Rusia manera Donetsk, segun e lider di Kremlin instala na e region, Denis Pushilin. E media di estado Ruso a reporta cu un reportero tabatin entre esnan victima, pero no a provee mas detaye tocante esaki.
Un persona tambe a muri y un otro a keda herida durante e bombardeo di e pueblo frontera Ruso Shebekino, segun gobernador regional Vyacheslav Gladkov.
