(CNN) – Hende mayor di 50 aña di edad cu ta biba riba nan mes por ta capaz di combati e debilitacion mental den nan cognicion verbal door di adopta un mascota den nan hogar, segun un estudio nobo. Perde e habilidad di haya palabra facilmente y compronde otronan ta señalnan trempan di demencia, segun investigacion.
“Tin un mascota por completamente contraresta e efecto di biba bo so riba debilitacion cognitivo,” segun co-autor di e estudio, Dr. Ciyong Lu, profesor di epidemiologia y ciencia medico y decano asocia di Scol di Salud Publico na Universidad Sun Yat-sen na Guangzhou, China.
Sinembargo, e estudio por a mustra solamente un asociacion, no un causa y efecto directo, segun neurologo Dr. Richard Isaacson, director di investigacion na e Instituto pa Malesa Degenerativo na Florida. E no tabata involucra den e estudio. “Ta mas corecto pa bisa cu e POR slow down [debilitacion cognitivo] y cu lo ta necesario pa haci mas estudio prospectivo incluyendo uno aleatorio pa saca conclusionnan mas definitivo,” Isaacson a bisa den un email.
“Un advertencia cu mi lo bisa ta cu si un persona cu ya ta biba nan so tin problema cognitivo, of limitacion fisico manera problema di balansa of bista, no lo ta consehable generalmente pa e persona aki adopta un mascota pa slow down e embehecemento di nan celebro,” el a agrega.
Isaacson a destaca cu cuida un mascota, specialmente un pushi of cacho, ta hopi trabao pa cualkier persona.
Biba bo so ta vincula na aumento di ansiedad y depresion, specialmente si ta despues di morto of separacion di un partner, segun estudionan. Un estudio na 2022 a haya cu biba bo so, compara cu biba cu otronan, ta aumenta e riesgo di depresion cu 42%. Depresion, alabes, por duplica e riesgo di desaroya demencia, segun cientificonan a descubri; un comision na 2020 a nombra depresion na edad avansa como un di e 12 mayor factor di riesgo pa demencia.
E estudio, publica diamars den JAMA Network Open, a analisa data di hende mayor di 50 aña participando den e English Longitudinal Study of Ageing kende tabata biba cu mascota. Investigadornan a analisa contesta na un test abrevia di palabra tocante animal, cu ta “evalua habilidad di e persona pa paga tino na e palabra, codifica e palabra, y recorda nan despues,” Isaacson a bisa.
Tin un mascota ta asocia cu velocidadnan mas slow di deterioro den un score general di cognicion verbal, memoria verbal y fluidez si un persona ta biba nan so, pero no si nan ta biba cu otro hende. E motibo pa esaki no ta cla, segun Lu.
Mientras cu ainda mester haci mas investigacion, tin un cantidad di motibo pakico tin un mascota manera cacho, pushi, pisca, parha of otro por reduci e riesgo di deterioro cognitivo, segun Lu. “Di prome, e compania cu mascota ta duna por reduci soledad y aumenta bienestar,” Lu a bisa, agregando cu “cuida mascota por yuda hende relaha y baha stress y ansiedad.”
Ademas, mascota por duna doñonan oportunidadnan pa conoce hende nobo y tin combersacion mientras por ehemplo ta cana cu cacho. De hecho, doñonan di mascota tin un score menor di isolacion social cu esnan cu no tin mascota, segun e estudio.
Drumi bon tambe tin un rol clave. Un estudio na 2023 a haya cu cada caida porcentual den soño ‘slow-wave’ pa aña tabata vincula na un aumento di 27% den riesgo di desaroya demencia y 32% di desaroya Alzheimer’s.
“Doñonan di mascota ta drumi mas facil cu esnan cu no tin mascota,” Lu a nota.
Algum mascota ta rekeri cuminda special, habitat y cuido veterinario, cu por duna un sentido di significado y proposito pa nan doño. Ademas, door di duna cuminda y cuida un mascota, doñonan tambe ta haci mas actividad fisico, algun biaha den naturalesa. Estudionan a haya cu pasa tempo den naturalesa ta reforsa sistema immuun, promoviendo miho salud.
“Compara cu esnan cu no tin mascota, doñonan di mascota ta haci mas actividad fisico vigoroso y modera,” Lu a bisa. Ademas, algun mascota ta rekeri por ehemplo acuario of hekinan, luz special, awa, mata of piedra, cu “por haci cu e doñonan ta establece conexionnan cu naturalesa, asina elevando e inmunidad di e doñonan,” Lu a bisa.
