Anteriormente e luna aki, Parlamento di Aruba a proba presupuesto 2024 di Gobierno di Aruba. Durante e tratamento di esaki, manera ta custumber, e ministernan a contesta pregunta di parlamentarionan relaciona na nan ministerio. Minister di Energia, Integracion y Labor, Minister Glenbert Croes a toca diferente punto y a elabora ariba e tema di WEB tambe.

Minister Croes a splica cu LNG ta baha prijs di awa y coriente, pasobra LNG ta mas barata cu HFO, pero el a remarca cu en realidad e gasto di awa y coriente no por baha inmediatamente. El a bisa cu LNG ta mas barata cu HFO, p’esey gobierno ta bay haci e switch y tambe pasobra LNG ta mas limpi cu HFO y ta ocasiona menos daño na medio ambiente.

El a sigui splica cu mester haci un inversion cuantioso pa por ricibi e LNG den WEB su facilidad y sistema pa usa. Door di e inversion cuantioso ey no por reduci e tarifa di awa y coriente inmediatamente.

E mandatario a indica cu WEB a recupera, contrario na otro persona cu por a bisa cu e ta den cora. El a resalta cu e entidad a recupera den sentido cu e ta cumpli cu e ratios cu e lender (fiado) ta exigi, pero ainda falta un suma pa recupera pa yega back na sumanan original di reserva cu a yega di yuda den pasado pa absorbe aumentonan cu aworaki no por absorbe.

“WEB ta recuperando su reserva. Sinembargo WEB no ta na e nivel ainda di fin di 2021, cual nivel ta necesario pa un compania manera WEB di acuerdo cu e guideline financiero den e programa di financiamento cu nan tin cu nan lendernan,” el a indica.

Pa loke ta e tema di HFO,minister Croes a splica cu WEB su ratio ta indica cu e por paga back su debe den caso di un prestamo cuantioso, p’esey e tabata importante pa e por cumpli cu e ratios.

El a splica cu WEB a hedge practicamente 95% di tur volumen di azeta pa añanan 2023 y 2024, y e nivelnan na cual hedge ta percura pa no tin ahustacion di tarifa, aumento, di awa y coriente.

E mandatario a sigui splica cu e politica di hedge di WEB ta encera cu e entidad ta hedge e prijs di fuel oil pa stabilisa e tarifanan presupuesta den e siguiente aña y pa preveni mas hopi cu ta posibel cu mester ahusta e tarifanan durante aña, pues trece aumento den e tarifanan.

Na mesun momento el a remarca cu tur e acontencimentonan internacional, e guera entre Rusia y Ucrania, e guera entre Israel y Palestina, e conflicto entre Venezuela y Guyana, ta haci e mercado di petroleo nervioso y esaki por hiba na aumento di prijs como consecuencia.

Minister Croes a indica cu durante 2023 WEB a logra hedge, manera ya caba menciona, 95% di e consumo di fuel oil cu ta presupuesta pa aña 2024 pa medio di varios contract di hedge. Na mei WEB a hedge e prome 50% di e 95% pa full aña 2024 y na october a cera e otro contract pa e otro 50% di e 95% pa full aña 2024. Cu esaki WEB a logra cubri 95% di consumo di fuel oil presupuesta.

“Cu esaki WEB ta minimalisa impacto di prijs di fuel oil riba prijs di awa y coriente,” el a resalta.

E hedge contract cu WEB a cera na mei 2023 ta implica cu WEB lo paga un prijs maximo di 67 dollar y un prijs minimo di 47.25 dollar. Den otro palabra, si e prijs di fuel oil ta riba 67 dollar, WEB ta keda paga 67 dollar, mientras cu si e prijs ta mas abao di 47.25 dollar, WEB ta keda paga 47.25 dollar. Entre e dos sumanan aki WEB ta paga e prijs di mercado.

E hedge cu a cera na october di 2023 ta implica cu WEB lo paga un prijs maximo di 77.25 dollar y un prijs minimo di 54.75 dollar. E cambio aki, el a señala, ta pa motibo cu e prijs na october ta mas halto cu na luna di mei pa motibo di, entre otro, e conflicto entre Israel y Gaza.

Minister Croes a subraya cu contractnan aki WEB ta logra un prijs averahe maximo di 72.12 y un prijs averahe minimo di 51 dollar pa aña 2024 y ta premira cu no lo mester ahusta, aumenta, e tarifa di prijs di awa y coriente den 2024.

E mandatario a resalta un nota cu e prijs averahe maximo pa aña 2024 ta alrededor di e prijs di fuel oil cu a usa pa calcula e tarifa actual di awa cu coriente, den otro palabra e tarifa actual ta proteha pa 95% pa e hedge contract den 2024.

“Ta baha nos kier baha prijs di awa cu coriente, pero den e situacion cu mundo ta bo ta protegiendo nos pueblo di un aumento drastico di tarifa di awa y coriente,” el a subraya.

E ultimo actualisacion pa loke ta e proyecto di Eagle LNG, cu a trece hopi discusion y opinionnan dividi, a bin durante un conferencia di prensa den luna di september, na unda Minister Croes a informa cu e proyecto ta continuando cu tur permisonan necesario pa su realisacion.

Den esaki, el a splica cu nan mester a haya aprobacion di Ministerio di Defensa di Hulanda pa loke ta trata e cooperacion pa pasa e tubonan necesario cerca of abao di Marinierskazerne na Savaneta, e cual el a indica cu a ser aproba.