Despues di discurso di minister di Cultura Xiomara Maduro, na Genootschap Nederland Aruba riba e Herdenkingsjaar Slavernijverleden e cual a keda “tot nader oder,” e peticion pa sigui participa den e proceso di negociacion of deliberacion over di e gobernacion pa haya fondonan pa proyectonan na Aruba ta continua.

Den un entrevista cu Bon Dia Aruba, Luc Alofs ken ta miembro di un plataforma cu ta yama Interinsulair Overleg tocante e pasado di sclavitud cu a ser lanta despues di e rapport den cual a skirbi tur e recomendacion pa cu Gobierno Hulandes na aña 2021, el a bisa cu nan a ripara cu aunke Gobierno Hulandes a pidi diferente colaboradornan na islanan pa por organisa dialogonan riba nan isla pa por duna imput na e rapport, esey a tuma luga na tur isla perteneciente na Reino Hulandes, menos Aruba.

Alofs ken tabata e coordinado pa Aruba a bisa cu e dialogonan a tuma luga pero nan no a wak nan mes back den e rapport di e consehonan Hulandes.

Mientras tanto, Gobierno di Hulanda a sigui papia cu gruponan di descendiente di Catibo na Hulanda “pero no cu nos, pasobra nan tin nan bril, nan tin nan punto di bista Hulandes y nan a lubida nos, pero akinan sclavitud a tuma luga.” El a bisa.

P’esey e coordinadornan di e dialogo insular a reuni y nan a bringa nan mes back aden e discusion den Reino, no solamente na Hulanda pa loke ta trata henter e proceso di excuus y e proceso despues.

Alofs como miembro di e comision tin hopi comunicacion cu otro miembronan di otro islanan y cu e diferente ministerio na Hulanda, “door di esey nos por a percura pa e isla ta back riba e agenda Hulandes.”

‘Tot nader orde’
 Alofs tabata presente na Hulanda e dia cu minister di Cultura, Xiomara Maduro, a hiba su discurso na encuentro di Genootschap Nederland Aruba riba e Herdenkingsjaar Slavernijverleden, nan a invita Alofs pa un presentacion riba e topico di sclavitud na unda el a señala cu Aruba a recupera di pandemia Covid-19 y ta recuperando positivamente na nivel financiero pero tabatin un problema manera el a sigura, cu Hulanda kier cobra un renta riba e lening di Covid hopi halto “pa motibonan cu mi no ta compronde, esey no ta mi asunto, pero bo no por duna excuus pa un cos cu a pasa den pasado ora bo ta sigui cu e actitud colonial den presente y esey a bin como un sorpresa grandi pa tur hende,” el a sigura.

Sin ataca ni defende minister Maduro segun Alofs ta splica cu e decision di lo no forma parti mas di e agenda pa conmemora e abolicion di sclavitud den Reino Hulandes cu e decision di para tur trabou ‘tot nader orde’ lo cual pa Alofs a bin como un sorpresa grandi y pa tur hende ya cu ni un hende tabata na altura di esaki.

Awor cu Aruba a retira su mes for di un di e hopi trayectorio cu ta andando y ta sigui y e consecuencia di mas grandi ta cu Hulanda a invita e islanan Caribense ex-Antias Hulandes pa forma comisionnan cu un representante di gobierno y un di comunidad, pa conhuntamente yega na un decision di con nan ta bay sigui cu e proceso, con nan ta bay organisa e fondo cu ta disponibel.

Hulanda a pone disponibel un fondo di 200 miyon euro, for di e fondo grandi aki Hulanda a tuma un decision cu e grupo Interinsulair a bringa hopi p’e manera Alofs ta menciona, pa motibo cu pa nan 200 miyon euro no ta hopi tanten nan no sa ken ta goberna e placa y con e placa ta wordo distribui pa e islanan, den esaki na november na Sint Marteen, Gobierno Hulandes a avisa cu e placa ta bay wordo parti den tres parti, 66 miyon euro ta keda na Hulanda pa e descendientenan y publico en general, 66 miyon euro ta bay na Surinam y 66 miyon euro ta bay na e islanan unda cu a traves di desaroyo di proyectonan e islanan ta haya fondonan y e grupo Interinsulair tabata hopi contento cu esey.

Aunke ainda no a wordo defini con e placa ey ta bay wordo goberna, y den sentido aki Alofs a bisa cu Gobierno di Aruba actualmente no ta den e proceso di negociacionnan di ki manera nan ta bay maneha e fondonan ey.

“Mi ta compronde e decision di gobierno, de bes en cuando mi ta observa, mi ta comunica y mi ta honesto, pero na mesun momento esey ta un miss oportunity pa awor, ta p’esey mi ta spera cu pronto Gobierno di Aruba y Gobierno Hulandes lo yega na un acuerdo over di e situacion di e interes pa nos como pais por participa den e proceso di negociacion of deliberacion over di e gobernacion di e 66 miyon euro, esey ta mi deseo pa Aña Nobo.” Alofs a expresa.

Fondonan disponibel pa proyecto via diferente organisacionnan
 Alofs a trece dilanti cu pa awor fundacionnan no a wordo afecta cu e decision aki pa motibo cu e fondo grandi no ta e unico y esey a wordo reparti caba, nan a bin cu un fondo di 1.8 miyon pa e Aña di Conmemoracion cu ta dura te 1 di juli 2024 e cual a keda den man di NiNsee un organisacion di representantenan di descendientenan di catibonan bibando na Hulanda, algo cu pa Alofs ta ok, pero, e ta señala cu ni e descendientenan na Hulanda por bisa si e proyectonan pa Saba of pa Aruba, ta realistico y si ta bay tin impacto den comunidad.

Hulanda a bay di acuerdo cu e argumento aki y nan a manda un suma di e placa ey di NiNsee pa Aruba cu ta bao encargo di UNOCA, nan tin e responsabilidad pa parti e placa pa e aña di conmemoracion.

Mondriaan fonds y Cultuurparticipatie tambe tin fondonan disponibel y fundacionnan interesa por entrega nan proyectonan den e organisacionnan aki, manera Stinchting Rancho cu ya caba a haya fondonan di Mondriaan fonds pa cierto proyectonan y tambe Cas di Cultura.

“Pero atrobe, nos como grupo Interinsulair kier e placa por wordo reparti akinan,” Alofs a comenta.

Estado Hulandes a ofrece excuus pero tambe e Banco Nacional di Hulanda y nan a pone disponibel un fondo di dies miyon euro y cada isla ta haya un proyecto di 500.000 euro cu ta ekivalente na 1 miyon florin, na unda Aruba ta bay haya un proyecto bunita.

Prins Bernhard Cultuurfonds tambe ta un otro organisacion riba cada isla cu nan experticio, y tambe por pidi proyectonan riba enseñansa, cultura y social economico, proyectonan pa fortalece iniciativanan economico.

Alofs tambe ta indica cu Aruba tin un problema, unda cu pa hopi biaha por wak gruponan cu ta parti placa cu no tin conocemento di e situacion local y otro problema ta cu hopi di e organisacionnan no tin e experticio pa formula proyectonan, “anto door di esey, esnan cu merece e proyectonan di mas, cu ta mas vulnerabel, no ta haya e oportunidad y esey no ta honesto, mi ta spera cu e organisacionnan manera UNOCA of Prins Bernhard Cultuurfonds por duna asistencia na gruponan cu ta bin cu un iniciativa.”

Pa otro luna, 31 di januari ta bay tin un otro discusion na Hulanda na unda Alof ta spera cu durante e combersacion ey ta bay bin decisionnan fuerte pa wak con ta bay sigui pa motibo cu esey ta keda un preocupacion y na Hulanda tabatin eleccionnan, e partidonan cu aworaki ta bezig di papia di posibilidad pa forma un coalicion no ta e partidonan cu a duna hopi muestra di sostene e excuus tocante e rol di Estado Hulandes den sclavitud, hasta e partido PVV di Geert Wilders a bisa cu nan kier retira e excuus pero esey no ta posibel, no por retira e palabranan di Rey Willem-Alexander.