(ElNacional) – Gobierno di Venezuela a saca e aña aki 137.756 ton di sushi solido, hopi di nan completamente yen di petroleo, for di lago di Maracaibo, esun mas grandi di e pais, den cual te cu diaranson ainda tin sushi y costanan contamina door di fuganan di crudo.
Vice-presidente di Obra Publico y Servicio, Nestor Reverol a indica a traves di Instagram cu e desecho aki a wordo recogi for di augustus ultimo, ora cu gobierno a pone den marcha un plan di limpiesa di e lago, afecta pa concurencia di desperdicio, expansion di un bacteria yama ‘verdin’ y e frecuente deramenan di petroleo di e estatal PDVSA.
Ademas di e sushi cu a wordo extrai, ehecutivo a cambia 400 kilometer di tuberia cu ta sumergi den e awa aki, cu ta pertenece na PDVSA, pa otro nan mas flexibel pa evita e derame- y filtracionnan den e reserva di awa dushi mas importante di e pais.
Reverol a reitera cu e logronan aki ta solamente e comienso di e plan cu ta premira di cambia 700 kilometer di tuberia, pa e lago stop di mustra berde y por recupera den su totalidad e color blauw, como tambe fiscalisa tur empresa cu ta opera den e awanan aki.
Tocante esaki, piscado Jose Luzardo, di 50 aña di edad, a splica na EFE cu, aunke tin partinan cu ta limpi, e problema ta keda persisti na varios zona, manera na unda e mes ta biba, den municipio San Francisco.
“Ainda nos tin contaminacion den e lago, nos no por saca ni un cabaron,” e homber a bisa cu ta papia di e cantonan di e lago completamente perdi den petroleo, loke ta bira un barera pa esnan cu ta purba drenta den e awanan aki.
Entre e accionnan tuma pa Ehecutivo den ultimo cinco luna ta destaca e despliegue di centenares di piscado cu, den nan embarcacionnan, a yuda cu e extraccion di plastic.
Di mesun manera, trahadonan publico y boluntarionan a cuminsa haci limpi un total di 600 beach afecta pa e contaminacion, algun di cual ta awe apto pa e uso publico.
Aunke e ehecutivo ta insisti cu e lago ta den excelente condicion, ambientalista- y ciudadanonan ta kere cu na e luga ta biba ainda un emergencia cu mester keda wordo atendi pa mitiga e impacto negativo den e economia pober aki y reduci e expansion di enfermedadnan asocia cu e contaminacion.
