“Pasobra un yiu a nace pa nos, un yiu homber ta duna na nos, y e gobernacion lo ta riba Su schouder. Su nomber lo ta Consehero Maraviyoso, Dios Poderoso, Tata Eterno, Prins di Paz.”

Asina e profeta a anuncia e nacemento di Hesus, cu nos ta celebra den temporada di Pasco.

Y awe nochi, mientras nos ta reuni como famia, amigo, bisiña of conoci pa e Anochi di Pasco, mi ta tuma e oportunidad pa dirigi mi mes riba un topico cu mundo a bin ta carece di dje, sigur si nos wak e acontecimentonan di e aña cu ta transcuriendo. Si nos sigui noticia internacional djis pa algun dia, nos no por saca otro conclusion cu nos ta biba den un mundo cu hopi violencia. P’esey, loke mi kier trece dilanti awe nochi ta hopi cerca di mi curazon: ta trata di e importancia di tolerancia den nos sociedad. Un sociedad multicultural unda generacionnan a crece, lanta, traha y biba hunto, di cual su miembronan – naci aki, of afor – kier lo mihor pa nos isla.

Tolerancia no ta un actitud di djis acepta tur cos di esnan cu ta diferente: e ta un compromiso profundo pa comprende, respeta y aprecia e diferencianan cu ta haci nos ken nos ta. E ta un reconocemento cu, a pesar di e variedad grandi di nos origen, nos tur ta igual cu mesun derecho y responsabilidad den nos comunidad.

Djis biba band’i otro ta un cos. Loke ta otro ta: ta un bon bisiña, extendiendo un man unda tin mester y convivi cu otro. Tolerancia ta encera un compromiso pa ta uni como pueblo, reconociendo cu nos diferencianan no mester dividi nos, sino mas bien complementa otro y asina reforsa e lasonan cu ta mantene nos como un nacion cu por enfrenta su retonan. Convivi cu otro, y no meramente coexisti.

Un angel di Señor a aparece na Jose, anunciando cu Esun cu lo Salba Su pueblo lo bin na mundo. El la bin pa siña nos compasion y stimacion cu ta surpasa bareranan cultural, religioso y nacional. “Stima bo prohimo manera bo mes”, te ainda ta un mensahe relevante pa nos. Esey mester inspira nos pa extende un man na otronan, construi puentenan en bes di murayanan di separacion pa asina nos ta sernan feliz.

Demostrando empatia na nos prohimo nos ta ripara cu e ta sirbi manera un fundeshi solido pa tolerancia, ya cu e ta promove comprension pa e otro su situacion, pa su sentimentonan y su perspectiva den bida. Ta manera nos ta pone nos mes den nan sapato, y ta purba comprende nan experiencia, emocionnan y desafionan. Asina nos ta comprende e hoben cu mester tuma un decision importante pa su futuro; e mama preocupa cu ta pasa anochinan sin drumi resando pa su yiu den mal caminda; y e inmigrante cu ta bandona su hogar cu hopi biaha ta cay den un red di trafico, of tin biaha no ta ni yega na bida e destino priminti.

Es mas, un actitud empatico ta yuda nos drenta den dialogo habri y constructivo cu hendenan cu a lanta den un otro ambiente cu nos. Nos ta mas inclina na scucha cu un curason yena cu compasion, loke ta activa nos cualidadnan Arubiano di amabilidad, union y harmonia. Y sin sa hopi biaha nos ta resolve nos conflictonan asina. Hopi biaha hende kier djis wordo scucha; sa cu tin un oido pa e desahoga su mes sin ningun expectativanan of promesanan. Esaki ta e diferencia entre convivencia y coexistencia.

Nos mester rechasa intolerancia, division y sembramento di odio di tur sorto di manera irefutablemente, y traha hunto pa crea un sociedad unda cada individuo tin e oportunidad pa prospera, independientemente di nan origen, habilidad, of creencia. Intolerancia ta un scuridad profundo unda discriminacion, falta di respet y hasta abuso por manifesta su mes sin wordo condena; caminda division social “di nos contra nan” ta reina; y unda e potencial di nos mes hendenan ta wordo neglisha.

Den e pais aki cu tanto nos ta stima, nos ta bendiciona cu un tehido di culturanan, idiomanan, tradicionnan, y creencianan. 60% di nos yiunan awendia ta nace y lanta den un hogar caminda cu por lo menos un di nan mayornan no a nace na Aruba. P’esey, diversidad cultural ta literalmente den nos DNA. Historicamente, cu desaroyo di diferente industria for di oro y fosfato, pa petroleo y turismo, a trece hende di diferente nacionalidad cu a haci di Aruba nan hogar. Bibando den union cu otro a forma nos como un pueblo amabel, cordial y respetuoso pa cu

otro como tambe pa cu nos bishitantenan. Esaki ta enrikece nos bida y amplia nos perspectivanan.

Den bida real nos ta mira cu si nos tene pasenshi, siña soporta y mustra comprension pa cu otronan, cu cos ta bay mucho miho. Un bunita ehempel ta pa mira con via Trampolin pa Trabou tin un team di esnan cu desabilidad pa sirbi como waiter. Cu nos aceptacion di e servicio diferente aki, nos ta acomoda nan y ta duna nan un rol di significado den nos sociedad.

Esnan intolerante no ta brinda espacio of libertad na individuonan cu ta “diferente” den nan wowonan. Ta pa e motibo aki cu lamentablemente nos ta wordo confronta diariamente cu imagennan tristo di loke conflictonan por trece cune. No solamente na nivel mundial, pero tambe den nos region y te hasta riba nos pais.

Nos mester scucha activamente nos mes hendenan – of grupo di hendenan – unda nan ta sinti cu nan derechonan no ta wordo salvaguardia. Ta bon pa nos ta habri pa dialoga cu e gruponan aki y informa nos mes di nan situacion. Pa brinda nos futuro generacion e oportunidadnan cu nan merece, laga nos siña nan con pa biba den paz y harmonia cu otro. Nos no mester cultiva miedo pa esnan cu ta pensa diferente.

Den e spirito di Pasco, laga nos emula e lesnan di Niño Hesus cu a nace pa nos salbacion, kende a pidi nos pa stima nos prohimo manera nos ta stima nos mes. E stimacion aki no mester conoce fronteranan di raza, creencia, of nacionalidad.

Hesus a papia cu Su siguidornan, bisando: “Ami ta e luz di mundo; esun cu sigui Mi lo no cana den scuridad, ma lo tin e luz di bida.”

P’esey, e Pasco aki, laga nos busca guia di e luz di tolerancia pa descubri con esaki ta contribui na un sociedad mas harmonioso. Laga nos traha na nos mes pa siña respeta e derecho di otro pa tin nan propio creencia y custumbernan. Asina nos ta cultiva respet, aprecio y proteccion pa loke ta di nos. Laga nos confirma nos compromiso pa rechasa prehucio, discriminacion, y odio, pa asina nos fortalece e fundeshi di nos Sociedad y pa asina paz reina entre nos. Y asina … kizas … nos lo mira nos bida cu un proposito mas.

Den nomber di mi casa Hanneke y mi yiunan, permiti mi termina, deseando boso tur, un Pasco yen di alegria, paz, amor y tolerancia, y un Aña nobo yena cu misericordia di nos Señor Hesus.