Awe ta dia cu oficialmente temporada di klapchi ta cuminsa y aunke esaki ta trece cune hopi alegria, ta importante pa tene cuenta cu e amiguitonan di cuater pata ta esnan cu mas ta wordo afecta pa e tradicion di kimamento di klapchi. Pa e motibo aki, Bon Dia Aruba kier pone enfasis ariba algun tips hopi importante pa tene den mente pa mantene mascotanan sigur durante e temporada aki.
Un di e tips mas importante pa doñonan di bestia ta pa tene e mascotanan paden di cas, esey ta miho solucion pa e dianan cu tin kimamento klapchi, specialmente pa dia 31 di december anochi. Durante e dianan aki hopi bestia ta perde, vooral cacho, pasobra na ta spanta y nan ta core bay.
P’esey tambe ta importante pa doñonan di mascota tin nan mascota microchipped. Den un caso cu e mascota sali huy for di cas pa motibo di miedo, e microchip ta un manera eficiente y facil pa logra haya e mascota back.
Den e temporada aki tambe hopi hende ta prefera di bay den e direccion di medicamento pa trankilisa nan mascotanan, pero no semper esaki ta un bon idea. Tin hende ta cumpra pildo trankilisante na veterinario, pero no ta tur bestia ta sali bon cune y e medicamento por perhudica e mascota, den sentido cu e ta verdoof nan, pero e zonido mes ta keda activo. E medicamento por paralisa nan, pero e zonido ta keda toch fuerte y esey ta pone cu tin bestia ta bira mas nervioso.
Si un persona ta desea di duna nan mascota un medicamento asina, ta hopi importante pa busca mas informacion cerca un veterinario prome cu tuma e stap aki, sea ta pildo of algo mas natural.
Otro tip importante ta cu si un doño di mascota tene nan bestia paden, ta bon pa pone cierto distraccion pa e mascota. Por ehemplo cera cortina, cende radio y/of television.
Ta importante pa e mascota haya suficiente oportunidad den dia pa haci su necesidadnan pa asina anochi e mascota por keda full paden sin tin mester di sali.
E bestianan no ta necesariamente scucha zonido mas duro, pero nan ta tende mas skerpi y nan ta tende mas leu cu hende. Nan por tende hasta e klapchinan cu ta wordo tira den e un otro bario cu por ta pa un persona no ta asina duidelijk, pero pa e bestianan e ta zona cla.
E zonido di e klapchinan por causa trauma cerca e mascota. Pa un bestia, e trauma no ta djis un anochi, e por keda cu efecto di e stress cu por causa cu e ta keda cu miedo pa zonidonan duro pa hopi tempo.
Un mascota ta custuma cu su doño of cu su famia na cas. P’esey e ta menos stress pa e mascotanan ora cu tin hende na cas durante e temporada di hopi stress pa nan, pasobra nan ta sinti e presencia di nan doño of di hende. Nan ta mas trankil y nan ta relax un poco mas, pasobra nan ta sinti e compania na cas.
Por ultimo, un tips importante na e automobilistanan pa nan tambe tene cuenta cu tin hopi mascota cu ta spanta y ta sali core bay ariba caminda. P’esey ta importante pa automobilistanan pone toch un tiki mas atencion riba caminda den e dianan aki, ya cu hopi bestia cu ta sali core bay den panico cu por sufri door cu automobilistanan no ta mira nan. Ta importante pa core na un velocidad mas slow unda por tene cuenta cu animalitonan cu ta core crusa caminda diripiente, y ta mas alerta pa mascota riba caminda.
Feliz dianan di fiesta!
