Gobierno Colombiano ta descarta un crisis migratorio pa transito Africano na aeropuerto di Bogota

(EFE) – Ayera diahuebs, Gobierno Colombiano a sigura cu “no tin ningun crisis migratorio” debi na Africanonan cu ta haciendo transito na aeropuerto El Dorado di Bogota, for di unda nan ta biaha pa Centro America, principalmente El Salvador, pa sigui nan caminda pa Merca.

Asina a manifesta vice-minister di Relacionnan Exterior di Colombia, Francisco Coy, ken den un conferencia di prensa a bisa cu Gobierno a detecta “e movemento haci mas cu un luna y mey” y cu e personanan aki, cu den nan mayoria nan ta yega for di Estambul, Turkia “ta hende cu ta den transito.”

E halto funcionario a splica cu na Bogota nan ta tuma “e vuelonan pa nan proximo destino, cu ta El Salvador” despues nan ta bay Nicaragua, pais cu ta permiti nan sigui “via terrestre te nort.”

Coy a splica loke ta sucediendo despues cu dos mucha di Guinea a ser bandona na Aeropuerto El Dorado na comienso di siman despues cu a yega Colombia den un vuelo di Estambul. Igualmente, medionan local a adverti cu un dozijn di Africano ta pega na e terminal aereo aki, pa loke Coy a bisa ayera cu “no ta un crisis migratorio.”

E vice-minister a splica cu “personanan cu ta pasa Colombia no ta realisa un proceso migratorio, sino cu nan ta ser someti na procesonan di verificacion,” den cual ta check nan documentonan y cu nan no ta bay keda na e pais.

“Tin periodonan di conexion hopi largo cu no necesariamente ta responsabilidad di e personanan cu ta biaha sino di aerolineanan cu no ta pidiendo verificacion di rekisitonan di ultimo destino,” el a agrega.

Pa transito na El Salvador, biaheronan di 57 pais, den nan mayoria di Africa, mester paga un tarifa di 1.130 dollar ora nan ta haci un conexion na e capital di e nacion aki.

Na Bogota “e casonan di personanan cu no ta sali (cu conexion pa otro pais) ta pasobra nan no ta cumpli cu rekisitonan. E personanan cu ta logr’e Migracion ta duna nan un tempo di spera,” el a bisa.

Despues di un tempo di spera rasonabel, “si nan no a logra sali, ta deporta e pasahero na nan luga di origen cu e mesun aerolinea cu a trece nan Colombia.”

E cifra di personanan cu no ta cumpli cu rekisitonan ta menor na 10% y Gobierno, segun Coy, ta traha cu aerolineanan -specialmente cu Turkish Airlines cu ta opera e ruta Estambul-Bogota y Avianca, cu ta bula di e capital Colombiano pa San Salvador- pa soluciona e problema.

Na mei ultimo, Canciyeria di Colombia a elimina e rekisito di visa di transito na ciudadanonan di casi 30 pais, entre nan ta figura por lo menos, 14 Africano, lo cual ta permiti na nan permanece na “zona di transito” hasta pa 24 ora.