Recientemente Parlamento di Aruba a aproba presupuesto 2024 di Gobierno di Aruba. Durante tratamento di e presupuesto, Minister di Finanzas y Cultura, Xiomara Maduro a enfatisa e importancia di e surplus den tanto presupuesto 2023 como presupuesto 2024.

Presupuesto 2024 ta e segundo presupuesto di Gobierno di Aruba cu ta conoce un surplus di 1%, cual ta ekivalente na 70 miyon florin. Minister Maduro ta enfatisa cu esaki ta un hecho importante, pasobra e ta mustra cu no solamente den presupuesto 2023 “gobierno a trece un cambio grandi pa locual ta finanzas publico di pais Aruba, pero e cambio aki ta sigui den 2024 y lo por sigui bay mas dilanti, pa asina demostra e parti structural di surplus den nos presupuesto di pais Aruba.”

E mandatario a remarca cu durante e reunionnan publico pa trata presupuesto, varios parlamentario di parti di oposicion a trece pa dilanti e hecho cu tin surplus como un critica of algo negativo, pero el a indica cu esaki ta algo positivo. Sobretodo si imagina kico lo ta pasando si ainda presupuesto di pais Aruba lo tabata den deficit.

Durante e tratamento di presupuesto a bin dilanti e punto cu pueblo mes no a mira of no a sinti ainda e impacto di e recuperacion economico cu gobierno ta referi na dje. Minister Maduro ta indica cu na tur pais cu tin recuperacion economico, incluyendo Aruba, e recuperacion aki tin cu cana su ciclo.

El a resalta cu e ciclo ta cuminsa prome, pa Aruba specificamente, cu e recuperacion den turismo. “Esey ta motor di economia di pais Aruba pasobra despues cu tin e recuperacion den turismo, ta bin e recuperacion economico,” el a subraya.

Despues, el a sigui splica, ta bin recuperacion den finanzas publico di e pais y e ultimo parti di e ciclo di recuperacion, segun Maduro ta señala, ta e recuperacion pa pueblo di Aruba.

“Presupuesto 2023 y 2024 cu tin surplus ta mustra bo caba cu e ciclo di recuperacion ta andando. Pesey poco dia [atras] minister president a trece padilanti y el a splica cu Aruba ta recupera, pero e recuperacion ey no a yega tur caminda cu e mester ta. P’esey despues di esaki, y mirando e ciclo di recuperacion, nos mester por sa cu e recuperacion aki tambe awor ta na e momento cu e tin cu bay yega cerca e pueblo,” el a subraya.

E no a menciona ki rol e aumento di impuesto, incluyendo introduccion di BBO na frontera, tabatin riba e hecho cu gobierno a cera cu surplus.

E mandatario a splica cu solamente ora cu tin surplus den presupuesto tin espacio fiscal pa gobierno por duna pueblo back, manera cu ta wordo sugeri. El a remarca cu gobierno no percura pa surplus, e no por tin e placa pa duna back na pueblo.

El a enfatisa cu cualkier alivio fiscal ta costa placa y cualkier servicio extra ta costa placa.

El a agrega tambe cu Aruba ta bezig cu reformanan cu tin den e landspakket cu a acorda cu Hulanda, pa gobierno por ta mas fuerte y resiliente. E reformanan aki tambe, el a indica, ta costa placa.

Maduro a resalta cu presupuesto di 2024, mescos cu esun prome, ta den cuadro di gastonan di personal y e acuerdo cu Aruba a yega na dje cu Hulanda, den e protocol di 2018. Den esaki a acorda un suma maximo di 479 miyon florin pa gasto di personal y segun el a señala, e presupuesto di 2024 tambe ta cumpli cu e acuerdo aki.

El a indica cu pasobra tin espacio financiero den e surplus di presupuesto 2024, esey ta haci cu tin fondo disponible pa baha e presion di debe di pais Aruba.

“Esey tambe ta algo cu ta importante. Nos economia di un banda a crece y di otro banda nos ta cumpli pa por baha cu e surplus aki y paga e debe di pais Aruba, y esaki ta trece cune cu e peso di debe riba economia di pais Aruba tambe ta baha. Si nos no haci e mega debe cu nos tin manehable, si nos no tin surplus den presupuesto di pais Aruba, nunca nos lo por brinda alivio na e pueblo,” el a subraya.

E mandatario a splica cu den presupuesto 2024 a presenta tambe un nota pa asina na un forma simpel splica no solamente Parlamento, pero tambe pueblo di Aruba, e cifranan di debe di e pais.

El informa cu den e nota aki por mira kico e debe aki ta costa cada hende na pais Aruba. Prome cu pandemia, durante gobierno di Gabinete Mike Eman, cada ciudadano tabatin un debe di 39.531 florin.

Despues di pandemia por mira, den e nota di presupuesto 2024, cu e suma aki a bira 52.305 florin. “Esaki ta e realidad cu e cifranan ta bisa. E ta facil pa tende storia y critica, pero te aworaki mi no a tende ningun bini cu un solucion,” el a remarca.

E mandatario a enfatisa cu e gobierno di Gabinete Wever-Croes a haci un diferencia den finanzas publico di pais Aruba y hecho cu presupuesto 2023 tin surplus, presupuesto 2024 tin surplus, esey ta duna oportunidad pa por duna pueblo alivio.

“Sin surplus bo no por duna pueblo alivio. Esun cu ta sali di e sala aki pa bay desgaba e surplus, pa bisa cu gobierno por a hacie di otro manera, cu gobierno no ta duna back na pueblo. Si bo ta contra e presupuesto aki, e ora bo ta contra tambe pa bo por duna pueblo pasobra bo no por yuda e pueblo, bo no por brinda e alivio si bo ta keda den un sistema di deficit,” Maduro a agrega.