Tin un tempo stipula pa tur cos y tin un tempo pa tur evento bou di shelo. Un tempo pa nace y un tempo pa muri, un tempo pa planta y un tempo pa cosecha. Tur cuminsamento tin su final. Tur producto tin un fecha cu e ta caduca. Nos bida na e mundo aki ta pasahero. Esun cu sembra bondad lo sa di cosecha bondad. Tur locual cu bo sembra lo bo recoge cu tempo. J.F. Kennedy a yega di bisa no puntra kico bo pais por haci pa bo sino kico bo por haci pa bo pais.
Dianan ta pasa y pronto nos por mira e final di 2023. Pa hopi no tabata un aña facil pa motibo cu nos pueblo tin cu haci hopi sacrificio cu tanto aumento di costo di bida. Den hopi cas nos sa cu pueblo ta lucha pa sobrevivi. No ta un sentimento agradabel. Mientras cu nos tin rosea nos mester sigui lucha sin tin garantia riba un futuro mihor, pero en todo caso tin e siguridad di a haci bo maximo esfuerso pa logra e mihor futuro .
Nos di partido Curpa durante 2023 a laga nos bos resona y a señala locual cu segun partido Curpa no tabata corecto. Nos di partido Curpa ta hopi agradecido na Dios na prome lugar y tambe na nos lectornan y tur esnan cu tabata habri pa ricibi nos informacionnan. Partido Curpa ta e bos di esnan cu pa motibo di miedo pa represaya ta keda keto. Nos por mira riba un aña fructifero pa partido Curpa. Nos ta e unico partido politico Cristian cu for di principio ta hibando un lucha pa locual cu ta e famia cu Dios a crea cu den Su palabra ta bisa bay sea fructifero y multiplica y yena e tera y somete esaki na bo. Tur locual cu Dios a crea ta bon. Unda e husticia di Dios t’ey tin paz, amor y tin prosperidad. Dios a crea matrimonio cu un proposito pa multiplica.
Nos pueblo mester sigui lucha paso 2024 ta mustra di bira un aña dificil. Den e prome kwartaal caba, pa motibo cu e situacion economico mundial, e situacion lo bira pio prome cu e drecha. Caida di e dollar Americano cu 30% lo bay afecta Aruba sigur. Nos fondo di pensioen segun informacion cu nos ricibi a perde 200 miyon florin na 2008. E caida di stock market ta sigur. Prijs di oro y zilver lo subi sigur.
Nos por tende politiconan bin cu yen di plan pero si e no ta di acuerdo cu e plan di Dios e lo no prospera, El Salvador cu tin un president Cristian, nos por mira un cambio grandi cu a tuma lugar. Un pais unda bida di hende no tabata tin balor, awor e pueblo por biba sigur y por mira prosperidad y adelanto. E pueblo di El Salvador tin speransa y tin futuro.
Nos ta bibando den un tempo biblico y cu speransa y fe den Dios nos Aruba dushi tera lo prospera. E tempo di Dios ta perfecto y unicamente den e boluntad di Dios nos por mira un mihor futuro pa nos isla. E resultado di somete na e boluntad di Dios ta bendicion. P’esey mes partido Curpa ta manda un mensahe di speransa na nos pueblo di Aruba. Cu Dios na nos banda nos lo mira e cambio. Dios ta Esun cu ta cambia temponan y epocanan; E ta kita reynan y ta pone reynan; E ta duna sabiduria na sabionan y conocemento na hombernan di comprendemento. Dios ta Esun cu ta revela e cosnan profundo y scondi. E sa kico tin den scuridad y e luz ta biba cerca dje. Nos politiconan no ta honra Dios paso nan ta bay contra di Su leynan y awe henter nos pueblo ta sufri pa es motibo aki. E palabra di Dios ta si y Amen. Nos di partido Curpa kier gradici for di profundo di nos curason pa e sosten durante 2023. Danki na e sosten aki nos lo sigui lucha pa mira nos isla wordo transforma na bienestar di un y tur. Nos di partido Curpa ta desea henter nos pueblo di Aruba un Bon Pasco y Feliz aña 2024 cu e paz, amor y felicidad reina den cada hogar di nos pueblo di Aruba. Partido Curpa e unico alternativa.
