E aña aki un bes mas Minister Ursell Arends ta lansa e campaña pa microchip mascota. E biaha aki e enfoke ta pa microchip di ambos cacho y pushi, conscientisando doñonan di mascota di e beneficio pa microchip nan mascota.
Kico ta Microchipping?
Microchip ta un obheto micro (chikito) cu tin informacion di mascota y su doño. E chip aki ta wordo inyecta bou di e cuero di un cacho of pushi. E microchip ta hopi chikito y ta wordo poni den menos di 2 seconde via un hangua pa un veterinario profesional. Asina cu e tin e microchip, e veterinario ta registra tur informacion di rasa, genero, nomber, caracteristica y informacion di e veterinario y doño den un sistema di registracion di mascota central.
Doño di mascota por microchip nan cacho of pushi pa solamente Awg. 25,-, un suma subsidia door di Ministerio di Naturalesa, y por haci un cita na tur veterinario.
E pasonan cu mester tuma ta lo siguiente:
Scoge un veterinario preferi ;
Tuma contacto cu e veterinario pa haci un afspraak pa microchip bo mascota;
Presenta riba e fecha di afspraak y paga solamente Awg. 25,- pa e chip.
Dicon microchipping ta importante?
Microchipping ta importante no solamente pa bo mascota pero como doño di e mascota bo ta contribui na un bon causa, cu ta enfoca ariba e desaroyo di e prome sistema di registracion central pa mascota di Aruba. Ora bo mascota tin su microchip e ta wordo automaticamente registra na e sistema central “Aruba Pet Registry”, esaki ta crea un identidad propio pa bo mascota. Otro beneficio di e microchip ta cu den caso cu e mascota perde, e por identifica esaki via e microchipreader door di tur veterinario, fundacionnan, KPA, BCI y tambe Centro di Control di Cacho. Esaki tin como beneficio cu e mascota por yega mas lihe na su doño.
Abo ta un doño responsabel pa bo mascota?
Un mascota sea cacho of pushi por biba te cu 15 aña y si bo cuid’e bon e por biba hopi mas. Pero un mascota ta un ser bibo y domestico, esaki ta nifica cu e ta depende 100% di bo como su doño. E ta depende di bo pa no solamente ariba su awa y cuminda, pero tambe cuido medico, siguridad, atencion y amor. Un mascota cu ta haya cuido y amor di su doño ta biba largo y feliz. P’esey e ta importante pa pensa prome cu busca un mascota, sea pushi of cacho, pensa riba kico ta su necesidadnan y con bo lo cuid’e? Kico bo mester haci y cuanto placa esaki lo costa bo? Kico ta bo responsabilidad como doño di mascota?
Kico tur bo mester tene cuenta cune ora bo busca un mascota?
Esaki ta un lista pa duna un bista di kico ta importante:
Cuminda y awa limpi tur dia ;
Luga cu sombra pa sconde for di elementonan natural entre otro: biento, solo y awa ;
Microchip pa e wordo registra oficial como bo mascota ;
Sterilisacion (spay & neutering) pa ambos macho y hembra pa evita cu e ta haya puppies of kittens inespera ;
Cuido medico, vacuna, vitamina, medicamento contra carpata y bichi di curason etc.
E lista por sigui agrega na dje, pero pa bo tin un mascota y compañe feliz esaki ta locual bo tin cu cumpli cune.
Por tuma contacto cu Centro di Control di Cacho na 592-9777 of bishita www.amitaresponsabel.org pa mas informacion. Corda Microchip bo mascota pa asina e wordo registra oficial y tambe sterilisa bo cacho pa e no reproduci y contribui na e problematica di sobre-poblacion na Aruba. Ban sea doño responsabel pa nos mascota.
