(AP) – Un Mundial di 32 team pa clubnan ta e wega mayor di FIFA pa cambia e cara di futbol. Si e bira exitoso, e lo sigui e Premier League Ingles y e Champions League como un di e competencia deportivo mas popular y lucrativo na mundo, generando biyones di euro.
Di otro banda, por genera critica di hungador- y coachnan, cu ya ta keha di e kalender preta pa competencia.
“Mi no ta contra competencianan nobo, mi ta contra e falta di tempo pa recupera aña tras aña. Esaki mester cambia,” manager di Manchester City, Pep Guardiola a bisa ayera na Jeddah, Saudi Arabia, unda nan tin intencion pa gana e ultimo Mundial di Club prome cu e keda ‘rebooted’ radicalmente.
Sindicato di hungadornan FIFPRO a bay mas leu despues cu FIFA a anuncia e fecha pa e prome edicion di e torneo expandi, cu anfitrion Merca, dia 15 di juni te 13 di juli 2025. A bisa cu e hungadornan ta preocupa pa e presion mental y fisico extremo cu varios competencia di club y team nacional, cu ta conduci na cansansio, lesion, problema di salud mental, mal prestacion y riesgo na longevidad di nan carera.
Diadomingo, FIFA a bisa cu e fechanan lo ta “harmoniosamente alinea cu e kalenter internacional di partido” pa sigura cu tin suficiente descanso pa e hungadornan prome cu comienso di e liganan domestico.
Pero un torneo expandi significantemente na 2025 ta nifica cu hungadornan top ta enfrenta tres aña consecutivo di competencia mayor durante e offseason usual, mirando cu e Campeonato Europeo y Copa America ta tuma lugar na 2024 y e proximo Mundial ta na 2026.
E plan ta pa tene e Mundial di Club cada cuatro aña despues di 2025.
“Clubnan ta hunga un rol fundamental den mundo di futbol, y e Mundial di Club lo ta un punto mayor den duna clubnan di tur confederacion un escenario adecuado riba cual por briya na e nivel mas grandi di e wega,” presidente di FIFA, Gianni Infantino a bisa.
