Cuerpo Policial Aruba ta preparando pa lansa e di 10 edicion di fin di aña. Tabata na 2013 cu a inicia cu un proyecto di grabacion pa trece un mensahe di positivismo pa e aña nobo binidero. Desde e tempo pa awo KPA a produci 10 edicion.
Dies edicion di mensahe di fin di aña traha y produci pa Departamento di Comunicacion, Informacion y Prevencion di Cuerpo Policial Aruba mes. Cada aña Aruba ta pendiente pa e mensahe di fin di aña cu a bira un tradicion di trece un mensahe pa e cambio di aña.
Comunidad ta mira diferente cara y concepto cu e famia di KPA ta brinda na nos comunidad. Cada bes ta ilustra y bin cu un concepto y mensahe diferente.
E aña aki no ta un excepcion y KPA ta cla pa lansa e di 10 edicion cu ta hiba e nomber di “Gosadera e Patruya Navideño”. E patruya ta pasa di bario pa bario pa trece e mensahe di alegria, hermandad, paz y harmonia. Pa asina KPA por trece bendicion pa cada hogar aki na Aruba. KPA ta enfoca pa usa nos talentonan local pa forma parti di e video y e biaha aki a toca turno na Edjean Semeleer cu su cancion di Gosadera.
KPA ta lansa e mensahe di fin di aña dialuna awor 18 december pa 11’or mainta ariba e pagina oficial di Facebook di KPA, tur e rednan social di KPA como tambe prensa local.
Nos ta yama danki na tur colega policial cu a forma parti di e mensahe aki y cu nos comunidad por disfruta di dje. Alabes Cuerpo Policial Aruba kier a desea nos comunidad completo feliz dianan di fiesta.
