Ayera den oranan di mainta, Centro Deportivo Betico Croes tabata e luga unda talento y creatividad a destaca den diferente categoria di gimnasia, cu e presentacion di muchanan muhe, muchanan homber y hasta hende muhe dunando un show hopi bunita yen di musica y alegria.
Adriana Sevilla, ken ta fungi como secretario y ta dirigi iLand Gimnastic & Sports Academy cu Perla Gimnastic Rhythmic and Artistic, Triton Gymnastics y Mantas Gymnastic a splica pa Bon Dia Aruba cu ayera tabata un dia di celebracion na unda tur atleta di e tres academia aki a cera aña 2023 cu e ‘Perla Oscars Gala.’ Tabata un presentacion exitoso di aproximadamente 240 mucha y muhe, ken a baila y a mustra nan habilidadnan artistico di gimnasia combina cu coreografia di pelicula of serienan manera Avatar, Harry Potter, Pinocho, Wednesday Adams, The Pink Panther, Encanto, entre otronan cu a duna na nan presentacion un toque di simpatia.
Di mesun manera Santa Claus tambe bin presencia e show, dunando un pabien na tur e atletanan cu a presenta hunto cu un “Merry Cristmas.”
Entre e atletanan mas destaca den e categoria aki tambe tabata presente Adriana Croes, ken recientemente a representa Aruba pa prome biaha den historia den e Campeonato Sudamericano di Gimnasia Ritmica.
Ademas di dje, tambe a presenta e grupo di National Rhythmic Gymnastics Team of Aruba, nan tambe a representa Aruba na Asuncion, Paraguay den e South American Championships.
E evento a cuminsa 10or di mainta y a caba 1or di atardi, manera a acorda caminda tur mucha a haci su best den presentacion aki bisti cu pañanan colorido di cada pelicula cu nan a presenta.
Sevilla a señala cu nan a cuminsa organisa y prepara e evento aki na augustus debi “cu ta un trabao hopi grandi di busca e musica, cort’e, diseña e pañanan y bestel nan pa nos por keda cla na tempo y nos ta contento cu nos a logra,” el a afirma.
