Aki ta sigui e di dos parti di e articulo “Varamento di tonino na Eagle Beach: Con pa yuda (parti 1)” cu a ser publica den e edicion di Bon Dia Aruba di diasabra, 16 di december 2023.

Con pa yuda den caso di varamento di tonino

Kico no pa haci: Si bo encontra un tonino pega riba beach, nunca lastr’e of ranc’e na su rabo of pectoral fin nan, pasobra e por causa lesion severo. No purba di rescat’e riba bo mes y transport’e bek leu den lama profundo. Accion nan aki, cu ta wordo haci sin evaluacion y experiencia adecua, por tin consecuencia grave pa e bienestar di e tonino. Ora di ta debilita, e por hoga. Obligando e tonino debilita pa keda forsa su mes pa yega na su refugio por causa malestar adicional y impedi su recuperacion.

Kico si pa haci: Rapidamente yama ASN pa ayudo na 5924333 (AMMF) of 100 (polis). Relata den bo yamada: e localidad uzando un punto de referencia (manda un location-pin via whatsapp, si ta posibel); fecha y ora di bo observacion; si ta morto of bibo; e tamaño y cantidad di mammal marino envolvi; si e ta den awa of riba beach; si tin multitud di hende of otro molester; bo nomber y informacion di contacto; si bo ta disponibel pa yuda.

Bo por yuda e tonino mientras bo ta warda riba yegada di ASN responders

Sea cauteloso pa proteha bo mes: Mantene bo cara leu di e blowhole di e tonino pa evita expone bo mes na posibel bacteria dañino. Sea alerta pa movemento repentino di su rabo y boca. No mishi cu ningun herida y lesion. Despues di tawata den contacto cu e tonino semper desinfecta man cu alcohol di 70%.

E prome ayudo basico: Puntra espectador nan presente pa yuda bo. Mantene multitud y mascota presente riba un distancia di seguridad y un ambiente trankilo y keto. Proteha e tonino di solo, cu serbete of paña muha riba su curpa (no tapa su blowhole, fin nan y wowo), cu un tent of parasol, of cu un barera di solo di curpa di hende.

Si e tonino ta riba beach: Dos persona, cauteloso y keto draai poco poco pa posiciona e tonino riba su barica cu su blowhole pa ariba. Usa serbete lora poni cada banda pa manten’e den e posicion aki. Traha un buraco bao cada pectoral fin y yen’e cu awa di lama (no ranca na su pectoral fin). Cautelosamente basha awa di lama riba su cuero (of serbete poni riba dje), protehando e blowhole cu bo otro man lora rond di dje, pa awa no drenta. No basha awa ora e blowhole ta habri.

Si e tonino ta den ola riba beach: Cuater persona, dos cada banda, cu man nan posiciona bao bariga di e tonino, carg’e y hib’e poco poco pa e zona di lama mas calmo net patras di e olanan riba beach, keda den profundidad cu no ta surpasa haltura di bo heup. Sigui carg’e asina den awa pa yud’e drief, manteniendo su blowhole ariba y semper pafo di awa, cu su cara dirigi pa lama grandi cu un caminda liber di obstruccion.

Ora e ASN responder nan yega: Nan lo colecta informacion, evalua e situacion, determina e accion apropia pa procede cune, y tuma over e cuido di e tonino.

Causa di varamento

E Stenella attenuata ta e di dos especie mas comun di tonino conoci pa busca refugio na Aruba, ora nan ta vulnerabel y debilita, manera ora nan ta herida, malo, cansa, of pariendo. Tin biaha tambe pa scapa di persecucion di apredador, manera tribon, Pseudorca y Orca. Tipicamente e tonino ta bolbe lama grandi na bahada di solo. Periodo di recuperacion por dura pa algun ora, algun dia den e mesun area, of algun siman, cu cambio ocasional di lugar. Lamentablemente, algun di nan ta resulta pega riba beach. Na Aruba tin 21 especie di mammal marino confirma, di cual 15 ta documenta cu un of mas varamento. Varamento ta sosode bibo of morto. Esun nan bibo por sosode sea accidentalmente of intencionalmente. Mammal marino den bon salud por pega na beach accidentalmente pa motibo di desorientacion causa pa e tipografia di e costa, abnormalidad magnetico, ora di persigui prooi of huida di menasa (manera persecucion di preditador of zonido duro), y cambio den mareo. Nan por tambe pega riba beach bibo intencionalmente pa motibo di debilidad causa pa stress medico, por ehempel di ta lesiona, malo, of hopi cansa. Acoso humano, golpi cu lancha y propeller, enredamento den ekipo di pesca, zonido duro bao awa (manera explosivo di ehercicio militar y air gun di seismic surveys), contaminacion, persecucion di apredador, toxina natural (manera Red Tide, Karena brevis), y fenomeno meteorologico extremo, por tur contribui na un estado di debilitacion cu por provoca varamento.

AMMF y ASN

Aruba Marine Mammal Foundation (AMMF) ta activo como coordinador di varamento di Aruba desde 1998. Banda di boluntario nan di AMMF, e Aruba Stranding Network (ASN) ta consisti di stakeholder nan gubernamental y di NGO. E obhetivo di ASN ta pa duna accion rapido y efectivo pa bienestar di e mammal marino, pa proteha e publico mientras cu ta maneha ayudo na e mammal marino, y pa logra colecta dato cientifico. ASN tin sosten di experticio di organisacion y red nan regional y internacional, a ricibi training di Caribbean Stranding Network y recien di e proyecto SPAW RAC CAMAC cu e Stranding Expert Panel di IWC. Ora di encontra mammal marino den un situacion cu nan tin mester di ayudo, por fabor yama ASN na 5924333 (AMMF) of 100 (polis). Pa mas informacion por tuma contacto na AMMFinfo@gmail.com.