Ayera mainta, minister di Labor, Energia y Integracion, Glenbert Croes a anuncia e aumento di salario minimo for di 1 di januari 2024. Ademas, na luna di mei lo cuminsa un trayecto legislativo pa trahadonan por haya un salario mas husto pa oranan traha, manera e minister a splica pa Bon Dia Aruba.

Croes a anuncia e firmamento di e reglamento ministerial na unda ta indica cu pa 1 di januari 2024 salario minimo ta aumenta na 1.986,20 florin, loke ta ekivalente na 4.9%.

 

El a splica cu salario minimo semanal ta bira 463,25 florin y salario minimo pa esnan cu ta traha como empleado domestico ta bira 926,65 florin of 10,30 florin pa ora.

Den un declaracion pa Bon Dia Aruba, minister Croes a señala cu dia 1 di mei 2024 nan ta bay cambia structura di salario minimo pa por paga esaki pa ora, loke ta ser yama “minimale uurloon.” Na e momentonan aki, si un persona ta traha 40 ora of 45 ora nan ta haya e mesun salario minimo, “pero esey ta bay cambia dia 1 di mei di otro aña,” Croes a señala, agregando cu “salario minimo ta bay cambia pa ora. Kiermen si un persona ta traha 45 ora por ehemplo, e ta bay haya e salario minimo cu e oranan cu el a traha cu ta 45. Esey ta mas husto y no manera e ta awor. Esaki 1 di mei a ser aproba awe na conseho di minister y awor ta bay tuma e trayecto legislativo pa por ser aproba na Parlamento di Aruba.”

Minister Croes a gradici esnan cu a participa den henter e proceso cu ta tuma luga fin di aña, unda cu como minister di Labor e ta tuma conseho di Departamento di Labor, De Sociaal Economische Raad (SER) den cual tin gremionan di gobierno, sindical y comercial cu a presenta pa duna nan conseho, y ademas e apoyo cu el a haya na conseho di minister pa por subi salario minimo.

Na januari 2023 e mandatario a aumenta esaki na AWG 1893,40 y pa 1 januari 2024 e salario minimo ta aumenta cu 92,80 pa luna yega te 1986,20.

Desde cu minister Glenbert Croes ta e titular di Labor, cual cartera el a asumi 17 di november 2017, el a haya e salario minimo na 1711,15. Na 2019 el a aumenta esaki na 1762,48.

Manera ta conoci, 2020 COVID a dal na nos porta y gran parti di nos poblacion a perde trabao, comercio di Aruba a wordo afecta gravemente y a pasa dos aña hopi dificil durante pandemia. Pues pa 2021 y 2022 no tabatin espacio pa por introduci un aumento salarial. Pero ya entrante 1 di januari 2023 e mandatario a aumenta e salario minimo y awo pa 1 januari ta pa di 4 bes cu den su 6 aña como minister cu e ta logra introduci un aumento cu apoyo unanime di Gabinete Wever Croes 2, manera a informa.

“Aruba ta den un ascenso economico danki na nos Turismo. Y e motor di nos turismo ta tur nos hendenan trahando den horeca cu merece e reconocimento di un aumento di e salario minimo como danki tambe pa nan empeño y servicio laboral,” a sigura.

Den un ultimo aumento na december 2022 e mandatario a repasa e desaroyo di salario minimo di ultimo decadanan. Durante 8 aña di Gobierno di MEP, di 2001 pa 2009, MEP a aumenta salario minimo cu un total di 431 florin. Durante Gobierno di AVP, cu a goberna den añanan cu Aruba tabata den bonanza, AVP a aumenta salario minimo cu apenas 134 florin so, den 8 aña di gobernacion. Desde 2017 di existencia Gabinete Wever Croes 1 & 2, Glenbert Croes como minister di Labor a percura pa den consulta cu SER y DAO, aumenta salario minimo cu un total di 216,06 florin.