Mediante un comunicado di prensa Camara di Comercio y Industria (KvK) ta bay introduci un cambio importante den e manera cu su usuarionan por log in riba ‘MyChamber’.
Segun e comunicado ta indica, entrante 15 di januari 2024 KvK ta bay introduci e “Multifactor Authentification” (MFA) pa tur usuario di e cuentanan di MyChamber. Esaki cu e meta pa mehora e seguridad di e database di KvK y proteha informacion sensitivo.
Tur cliente, existente y nobo, lo mester haci uzo di e MFA aki cada biaha cu nan kier drenta den nan cuenta di MyChamber.
KvK ta indica cu MFA ta agrega un capa di seguridad cu ta exigi e usuarionan pa duna diferente forma di identificacion prome cu nan por drenta den nan cuenta di MyChamber diKvK. Actualmente e usuarionan por drenta den nan cuenta door di simplemente haci uso di un e-mail cu un password cu cada usuario mester a crea na momento cu el habri su cuenta di MyChamber.
KvK ta agrega cu adicionalmente, entrante 15 di januari 2024, tur usuario ta bay ricibi un codigo via mensahe di texto (SMS) cada biaha cu nan kier drenta nan cuenta MyChamber.
Pa activa e protocol di seguridad MFA tur cliente di KvK, existente y nobo, lo mester registra di nobo na momento cu e cambio aki drenta na vigor entrante 15 di januari 2024.
Camara di Comercio ta enfatisa cu esaki no ta nifica cu e clientenan mester registra e negoshi di nobo den e Registro di Comercio. E registracion ta encera solamente registracion y verificacion di e e-mail di e usuario y registracion di un number di telefon, na unda e usuario ta bay ricibi un codigo cada biaha cu ta desea di drenta den e cuenta di MyChamber. E registracion aki lo wordo haci solamente e prome biaha entrante 15 di januari 2024.
