(ElNacional) – Venezuela lo destina e proximo aña 622.232.515 euro den su plan pa reforsa e presencia di Estado na e zona limite cu Guayana Esequiba, e teritorio pa cual e pais ta den disputa cu Guyana, cu lo administra e area ey, segun un partida di e presupuesto estatal.

Pa un proyecto yama “Consenso nacional: Guayana Esequiba”, e Ehecutivo di Nicolas Maduro a rekeri 25.720.533.723 bolivar, segun e cambio oficial di 35.64 bolivar pa cada moneda.

E cantidad aki a wordo aproba pa Asamblea Nacional (Parlamento) controla pa e chavismo, y ta forma parti di e 20.521 miyon dollar cu cual e presupuesto di 2024 ta aumenta, 77.44% mas grandi cu esun di 2023, ora cu e pais lo celebra eleccion presidencial.

Entre e tareanan specifico di e proyecto relaciona cu e zona den disputa, ta destaca esun di aumento di capacidad logistico, operacional y di infrastructura di Venezuela na e zona limite cu Esequibo, pa cual nan lo tin mester 678 miyon di dollar.

Vice presidente ehecutivo, Delcy Rodriguez, na momento di defende e presupuesto dilanti e diputadonan, a remarca e hecho cu ta inclui pa prome biaha un partida pa Guayana Esequiba, nomber cu ta duna na e estado cu Venezuela ta pretende di agrega unilateralmente, den atencion di un referendum no vinculante celebra dia 3 di december ultimo.

Gobierno lo destina tambe, entre otro cantidadnan menor, casi 30 miyon dollar den recopilacion di prueba historico huridico, geografico y politico ariba e controversia aki y un poco mas di 40 miyon dollar den establecimento di dialogo cu Guyana, cu formalmente a cuminsa diahuebs.

Diahuebs ultimo, mandatario Venezolano, Nicolas Maduro y su colega presidente di Guyana, Irfaan Ali a acorda na Saint Vincent and The Granadines un declaracion conhunto, den cual nan ta compromete nan mes na no menasa otro mutuamente ni usa forsa den ningun circunstancia relaciona cu e disputa aki.

Maduro y Ali lo traha hunto den rebaha e tension cu a aumenta den ultimo dianan, ora cu Venezuela a anuncia decisionnan unilateral cu ta apunta na agrega e teritorio di casi 160 mil kilometer cuadra den un discurso reitera cu a perde forsa despues di e reunion presidencial cu a wordo promovi pa paisnan di e region, specialmente pa lider Brasilero, Luis Inacio Lula da Silva.