Un sistema social di cuido medico ta un parti profundamente positivo den un sociedad. Prome cu Segunda Guera Mundial no tabatin terminonan manera “Zieke Fonds”. Simplemente: bo bira malo, principalmente pa tempo largo cu bo no lo por traha mas, ta keda na famia pa yuda bo.

Esaki siguramente no ta un situacion preferibel pa un nacion rico. Na añanan 1950-1960, a bin sistemanan social di Salubridad Universal manera Zieke Fonds na Hulanda y NHS na Inglatera pa menciona un par di ehempel.

E problema di Fondo di AZV no ta uno di Aruba so, ta casi tur pais rico den “G20” ta enfrentando e problema di por paga e sistemanan universal di salud. E diferencia ta cu na Aruba nos lo prefera di no papia over e tijdbom cu ta fondo di AZV.

Rapport di Banco Central di Aruba

Den un rapport di 2021 cu yama “Governing from the Future: Leading with Impact”, di Banco Central di Aruba ta mustra entre otro e situacion simplemente espantoso cual ta e salud financiero di fondo di AZV.

E rapport ta publicamente disponibel y por wordo analisa via e siguiente link:
https://www.cbaruba.org/readBlob.do?id=10732

E siguiente grafico di pagina 36 di e rapport aki, ta mustra cu segun calculacionnan interno di Banco Central di Aruba su staff pa 2030, AZV lo wak deficitnan di grandura di entre 50-250 miyon florin pa aña!

Den opinion di e autor pa yama esaki un “Tijdbom” no ta un exageracion.

Tambe e mesun rapport aki na 35, ta mustra e situacion locual mi persona a skirbi di dje na varios ocasion cual ta e futuro financiero di SVB su fondo di Pension.

Pa ta duidelijk esaki no ta mi calculacion of opinion, pero di un rapport oficial di Banco Central di Aruba.

En fin e rapport aki ta bisa den lenguahe complica cu no tin decisionnan facil pa e problemanan aki. Tur solucion ta bay bin cu varios “side-effects” doloroso. Pero ban cuminsa papia di e asuntonan aki den manera profesional y hunto yega na solucionnan duradero den luga di haci manera e retonan aki simplemente no t’ey.

E problema fundamental

Ta obvio cu nos tin un gabinete cu no tin nivel di madurez pa simplemente admiti cu tin problemanan sumamente grave cu lo mester wordo enfrenta cual ta:

Fondo di SVB;

Fondo di AZV;

Un recesion global, cu lo afecta economia di Aruba;

E segunda ola di inflaccion monetario, cu un biaha mas lo baha poder di compras di pueblo.

Ta kies pa ignora e topiconan aki y pa opta pa struisvogel politiek. Esaki ta erg caba riba su mes.
Pero mas tristo ta cu supuestamente Aruba tin un Parlamento cu partidonan den oposicion, cu ta kies pa traha videonan di caricatura y yama colega Statenleden nombernan inapropia.
No ta wak ningun debate constructivo di e problemanan fundamental cu ta menciona.

Mas erg ta cu tur cos cu ta wordo menciona ta gewoon informacion publico di rapportnan cu tur hende tin acceso na dje.

Den defensa di Gobierno actual, por bisa cu e decisionnan cu mester tuma den e añanan binidero ta bay ta sumamente dificil y complica. Ni maske cua Gobierno bin na mando, por ta Berde, Geel, Regenboog y tur cos in between. Ta retonan di grandura di “Atlas” ta enfrentando nos clase politico elite.

Ban tuma e prome stap di madurez y gewoon bisa berdad cu e problemanan menciona ta presente y cu decisionnan profundamente dificil lo mester wordo tuma.