Fundacion Venearuba Solidaria y prome minister di Aruba, Evelyn Wever-Croes a expresa nan solidaridad cu famia di e victimanan di e tragedia reciente, unda un boto a naufraga na costa nort di Aruba y cuatro persona a perde nan bida.
“Cu profundo dolor nos ta lamenta e perdida di bidanan den incidente aki y nos kier transmiti nos condolencia na tur famia afecta. E tragico suceso aki a laga un marca inolvidable den nos comunidadnan y nos ta uni na e dolor y tristeza di esnan cu a perde nan ser keri. Na e momento dificil aki, ta esencial pa demostra empatia, apoyo y solidaridad mutuo pa hunto supera e adversidad,” a indica den un documento.
Venearuba Solidaria ta na disposicion di e famianan afecta, gobierno local y autoridadnan Venezolano pa ofrece e apoyo necesario y atencion cu e victimanan cu a sobrevivi ta merece, “nos ta reconoce e importancia di brinda un respaldo integral na esnan cu a sufri di perdida y trauma, nos ta comprometi pa colabora den tur loke ta na nos alcance pa por alivia nan dolor.”
Pa e motibo aki, nan ta haci un yamado na diferente autoridad competente pa atende e caso aki cu e seriedad, prontitud y responsabilidad cu ta merece, ta hopi crucial pa garantisa un investigacion profundo y transparente cu lo permiti aclaria e hechonan y determina e causanan di e naufragio, “ademas nos ta solicita pa brinda e ayudo necesario na famianan afecta, pa evita cualkier accion cu por re-victimisa nan garantisando e respet na nan derechonan y dignidad, na momentonan manera esaki, ta fundamental pa e sociedad den conhunto uni pa respalda e personanan afecta y traha den prevencion di incidentenan similar den futuro.”
Nan ta reafirma nan compromiso den e construccion di un comunidad mas sigur y solidario, na unda e bida y bienestar di cada persona ta prioridad.
Igualmente a gradici na tur persona, organisacionnan y autoridadnan cu ta colaborando atendiendo e emergencia aki y nan ta confia cu conhuntamente, por supera e momentonan dificil aki.
“Den memoria di e bidanan perdi den e tragedia aki, nos ta ofrece nos mas sincero condolencia y nos compromiso cu comunidad ta fuerte cu solidaridad y apoyo mutuo.”
Reaccion di prome minister di Aruba Evelyn Wever-Croes
Diahuebs 14 di December mainta, Prome Minister Evelyn Wever-Croes durante conferencia di prensa di Gobierno di Aruba, a elabora riba e noticia tragico di un boto transportando personanan for di Venezuela.
E siman aki a habri cu e noticia lamentabel aki na unda 4 persona a perde nan bida despues cu e boto a bolter den e lama bruto cerca di costanan di Aruba.
“Mi ta comunica cu nos comunidad awe c’un curason hopi tristo y preocupa. Palabra no por expresa adecuadamente e dolor cu famianan di esnan cu a fayece, ta sinti, specialmente den e dianan aki cu nos ta acercando Pasco. Den nomber di Gobierno di Aruba, mi ta extende mi sentimentonan di condolencia y convivencia na e familiarnan na Venezuela y Aruba di esnan cu a fayece den e tragedia aki”, prome minister a expresa.
Prome minister a remarca cu hopi biaha e personanan cu ta tuma curashi pa subi un boto y crusa lama bruto pa bin Aruba, ta wordo referi como personanan indocumenta of ilegal.
Sinembargo e personanan aki cu a fayece, entre nan, dos hoben prima, tambe tabata tin mama of tata, y tin cu a laga yiu atras. “Gobierno su departamentonan ta moviendo su recursonan pa atende cu e famianan di e 4 victima y alabes ta investigando e caso serio aki y atendiendo cu autoridadnan Venezolano pa evita y tambe asumi nan responsabilidad pa e casonan aki no ripiti”, prome minister a duna di conoce.
Tambe e mandatario a remarca, cu a pesar cu Aruba y Venezuela ta mustra hopi cerca di otro, e biahe aki den boto ta sumamente peligroso. Hopi ta e victimanan cu a purba yega Aruba den boto pero no a logra, y e siman aki un biaha mas, 4 persona ta perde nan bida.
Igualmente e ta haci un yamada na tur esnan cu ta invita famia y amigonan na Venezuela pa no usa e trayecto ilegal aki, kisas berdad pa busca un miho futuro, pero no haci esaki mas pa no pone nan bida na peliger.
“Por fabor, pensa dos biaha y stop cu esaki. Autoridadnan ta baha cu man duro riba esnan cu ta sigui pone bida di sernan humano, mama y tata inocente, na peliger. Gobierno so no por bringa esaki. Ban hunto compromete nos mes pa e tragedianan aki no pasa nunca mas”, Prome Minister a enfatisa.
Prome Minister a duna di conoce cu el a tuma contacto cu Consulado di Venezuela na Aruba y Embahada di Hulanda na Venezuela pa expresa sentimentonan di forsa y condolencia na e famianan di esnan cu a perde nan bida. Den e curso di e siguiente dianan, Gobierno lo trece mas informacion di loke cu ta haciendo pa actua cu man duro contra esnan cu ta sigui fomenta y stimula e tipo di tragedianan aki.
Cu e 4 persona cu e perde nan bida den e tragedia aki, por sosega na paz y cu Dios por duna nan sernan keri hopi forsa cu e perdida aki.
Noticianan falso coriendo rond tocante aparicion di 9 persona den boto na La Guajira
Den algun medio Venezolano a publica noticia cu 9 persona cu diasabra ultimo tambe a sali pa Aruba for di Buchuaco estado Falcon, por a yega na La Guajira na Colombia despues cu nan boto a haya un fayo mecanico.
Familiarnan di e personanan aki ta rabia debi na e noticia falso aki pa motibo cu nan mes no tin noticia precies di kico a pasa cu nan sernan keri cu ta ainda ta desaparecido. Nan ta comenta cu e circulacion di noticia no confirma riba rednan social y medionan a genera mas in certidumbre pa nan.
Jhonattan Petit, ken ta fungi como periodista na Falcon a conta na nos redactor cu e ta siguiendo e caso aki hopi de cerca y den combersacion cu Direccion General di Armada Maritimo, capitan di Puerto Bolivar di Departamento di La Guajira Colombiano, a informa ayera 14 di december cu e informacion a ser verifica a traves di un operativo cu comunidadnan den area “te awor no tin informacion di aparicion di personanan of e boto en cuestion cu ta reporta como desaparecido Guardia Costero di Colombia y Aruba no a duna informacion tocante esaki y ta considera cu e informacion ta confuso.”
