(AP) – Alemania su coalicion den gobierno a yega un acuerdo diaranson pa resolve un crisis di presupuesto causa pa un decision di corte luna pasa, kedando di acuerdo cu lo corta algun subsidio y gastonan mientras a enfatisa cu Berlin lo mantene su plan di aumenta e sosten pa Ucrania.
Canciller Olaf Scholz su coalicion di 3 partido a dura simannan ta dialoga tocante con lo trata cu e anulacion pa Alemania cu corte mas halto y su decision di reutilisa 60 biyon euro cu originalmente tabata stipula pa alivia e golpi di e pandemia di COVID-19 y usa esaki pa yuda combati cambio di clima y modernisa e pais. E maniobra aki a enkontra obstaculo den Alemania su limite impone pa su mes di aumenta debe.
E resultado inmediato ta un buraco di 17 biyon euro den proximo aña su presupuesto. Yena esaki den pura tabata un tarea dificil pa e coalicion kende su miembronan tin diferente prioridadnan. E gobierno di 2 aña a bira conoci pa discusionnan interno y a mira su resultado den encuestanan disminui. “Gobierno ta cumpliendo cu su metanan,” Scholz a bisa diaranson despues cu Vice Canciller Robert Habeck y Minister di Finanzas Christian Lindner. “Nos ta pushando bay dilanti vigorosamente e renobacion di nos pais na ta mas neutral cu e clima, nos ta fortaleciendo nos cohesion social y lo para di cerca banda di Ucrania den su defensa contra Rusia. Pero tambe ta cla cu nos mester logra haci esaki cu significantemente menos placa pa por logra e metanan aki,” Scholz a expresa. El a agrega cu “recortenan y spaarmento claramente nos no ta haci esaki contento pero nan ta necesario.”
Esaki lo ser logra pa medio di reduci e subsidionan cu ta daña clima y reduci un poco e gasto di algun ministerio, incluyendo ministerionan di transport, ambiente y labor segun e oficialnan. Gastonan cu e “climate and tranformation fund,” cual a ser directamente afecta pa e decision di corte lo keda reduci cu 12 biyon euro proximo aña y 45 biyon euro en general te cu 2027. Scholz a bisa cu e fondo toch lo tin un “volumen halto en general” di 160 biyon euro.
