(AP) – Andre Braugher, e actor gañado di Emmy cu tabata un master di drama pa 7 temporada riba “Homicide: Life on the Street” y comedia moderno pa 8 temporada cu “Brooklyn Nine-Nine” a fayece dialuna cu 61 aña di edad.
Braugher a fayece despues di un malesa breve, segun su publicista Jennifer Allen a conta The Associated Press. No a duna mas detaye tocante esaki.
E actor naci na Chicago a establece su mes den e rol di Det. Frank Pembleton, e rol lider riba “Homicide: Life on the Street,” un drama di polis basa riba un buki di David Simon, ken despues a crea “The Wire.” E show, cual a enfoca riba e unidad di homicidio na Baltimore Police Department, a ser televisa pa 7 temporada riba NBC y a gana elogio di criticonan cu Braugher como su centro dramatico y strea cu mas a resalta. El a gana su prome Emmy cu e rol aki, tumando e trofeo pa actor lider den un drama den aña 1998. E tabatin miedo cu a causa di e rol aki, e no lo por sali for di e rol di un oficial serio. “Si mi haci esaki pa demasiado tempo mi lo stop di busca dentro di mi mesun trabao,” el a conta AP den aña 1998. “Esaki ta un peliger grandi. Mi ta bay scapa di e trampa aki y busca un oportunidad cu lo ta trabao cu lo trece un desafio pami.”
Esaki no tabata un problema. El a sigui su carera y a hunga rol di un polis sumamente diferente riba un programa completamente diferente, cambiando na Comedia cu e rol di Capt. Ray Holt riba e programa “Brooklyn Nine-Nine.” Esaki a ser televisa pa 8 temporada for di aña 2013 te na 2021 riba Fox y NBC. El a purba comedia anteriormente cu e comedia dramatico “Men of a Certain Age,” sinembargo Brooklyn Nine-Nine a representa un cambio grandi pa Braugher, ken tabata conoci pa rolnan mas scur y pisa den dramanan. El a ricibi nominacion pa 4 Emmy durante e programa aki.
Braughter tabata casa pa mas di 30 aña na su co-actor di “Homicide” Ami Brabson. E ta sobrevivi pa su yiunan Michael, Iasiah y John Wesley, su ruman homber Charles Jennings y su mama Sally Braugher.
