Fase dos di proyecto Baby Beach a keda cla

Mediante un conferencia di prensa, minister di Turismo, Dangui Oduber a expresa cu e proyecto aki cu a conoce varios contratiempo den lunanan aki finalmente a ser entrega ayera mainta.

E proyecto ta forma parti di e Master Plan di Sero Colorado anuncia na aña 2019 cual ta consisti den mehoracion, embeyecemento, renobacion conforme e maneho di Ministerio di Turismo na unda a haci inversionnan den e producto Aruba enfoca den area di Baby Beach y Rodgers Beach.

“E intencion tabata pa ehecuta e proyectonan aki pero e planning a cambia totalmente na caminda, destaho publico a tuma luga na aña 2019” den esaki el a informa cu a haya cierto retonan na caminda manera pandemia di Covid-19 na unda mester a para e proyecto aki y haci’e den fase.

Ademas di esey, nan tambe mester a haya claridad den e financiamento di Aruba Tourism Authority (ATA) pa por haci e proyecto aki uno real, despues nan a dicidi di continua cu e fasenan na unda fase 1 ya caba a ser entrega y awor e fase dos tambe, cu ta consisti di crea espacionan nobo di parkeo, iluminacion, landscaping, ademas di un trapi nobo ubica na banda di e tennis court, cual tabata basta deteriora.

A anuncia cu e destaho publico pa fase 3 ta canando su caminda, esaki ta inclui e mehoracion di e tennis court cu ta bay bira dos cancha multifuncional na unda nan ta spera cu na comienso di otro aña e fase aki tambe lo cuminsa, pa finalmente e proyecto di Baby Beach pa di dos kwartaal di 2024 tur e area keda cla.

Pa e proyecto di Rodgers Beach, e mandatario a sigura cu e destaho publico tambe ta canando y e intencion tambe ta pa di comienso di prome kwartaal di otro aña e proyecto aki lo cuminsa y keda cla pa asina e Master Plan cu a ser crea varios aña pasa finalmente lo ser entrega.

“Esaki no ta solamente importante pa desaroyo economico sino tambe pa desaroyo turistico, pa asina prepara e area cu diferente atraccionnan,un cambio drastico di con antes e tabata ta y con e ta awe,” Oduber a señala.

Di su parti CEO di ATA, Ronella Croes a indica cu esaki pa ATA no solamente ta cumpli cu maneho nacional di turismo sino tambe tin un motibo di pakico e maneho aki ta dirigi riba producto turistico, “como tal, nos ta inverti como ATA entre 10% pa 15% di lo cual nos ta gasta anualmente cu ta bay den producto turistico mirando cu ta importante pa experiencia cu nos ta ofrece como Aruba, e calidad di experiencia, pa nos sigui eleva y mehora esaki unda cu por, pero tambe ta importante pa alinea esaki cu kico ta bon pa nos comunidad, pues e ta pa nos turistanan y nos comunidad,” Croes a bisa.

El a menciona diferente prioridad unda nan ta inverti teniendo na cuenta cu ATA su presupuesto ta mara hopi di cerca di kico ta importante y prioridad den sector turistico como siguridad, beachnan, hospitalidad, aspecto cultural, entre otro, pa e turista por experiencia mas, pero tambe den e diversificacion economico pa medio di experiencianan nobo cu ta ser ofreci como Aruba y tambe contribui na sigura cu e bishitantenan por move mas rond di e isla, no solamente bishitando e beachnan sino tambe ofrece na nan atraccionnan nobo.

“P’esey tambe ta inverti den Hooiberg, den un drechamento di trapinan, p’esey ta inverti den Ayo Rock Formation of den un Mountain Bike Trail tambe cu otro aña lo ta kedando cla tambe y asina por menciona mas ehemplo, diferente aspecto cu ta inverti den dje cu ta cumpliendo cu e maneho di turismo pero tambe ta importante pa accentua dicon e maneho ta enfoca riba esaki,” Croes a sigura.

E turista cu Aruba ta atrae ta hopi exigente, manera el a indica y esey tambe di nan banda nan ta contribui na e tipo di proyecto aki, ademas Croes a trece dilanti cu pa otro aña lo tin mas proyecto y cu ta cumpli cu loke a ser menciona caba.

“Sin lubida tambe di keda enfoca riba proteccion di naturalesa, proteccion di loke ta di nos tambe, y p’esey nos ta hopi contento di por colabora di cerca tambe cu Fundacion Parke Nacional Aruba,”

San Nicolas Business Asociation tambe tabata presente den e conferencia aki na unda su presidente Errol de Freitas a señala cu esaki ta un extension di progreso pa San Nicolas pero tambe tin otro areanan cu mester di atencion, por ehemplo Santana di Mascota cu den tempo di Lago segun el a sigura, “tabata algo bunita pero awendia, mi ta kere nos tin cu papia con ta bay drecha e area aki pa futuro.”