Situacion di concierto di Romeo Santos a trece duda riba Aruba su capacidad pa organisa evento grandi

Diasabra ultimo a tuma luga e concierto di Romeo Santos, cu a resulta causando gran polemica entre comunidad local despues cu e artista a presenta mas cu cuatro ora laat riba escenario.

E promotor di e evento, Krish Mahtani a publica un sincero disculpa riba su rednan social, bisando:

“Como e promotor di e concierto di ayera nochi na Aruba (Romeo Santos), y den nomber di henter mi team, mi kier extende mi sincero disculpa na tur esnan cu a atende e concierto ayera. Sorry pa e inconveniencia y e decepcion cu e retraso por a causa. Desafortunadamente, circunstancianan no anticipa a tuma lugar cu tabata completamente fuera di nos control, resultando den retraso di e artista. Como promotor di e evento, mi ta asumi responsabilidad completo pa a faya di comunica e situacion na tempo.”
Ademas, el a agrega cu “ta tuma e incidente aki na serio y ta comprometi na preveni instancianan asina den futuro” y a gradici e publico pa nan “pasenshi, comprension y sosten continuo.”

E disculpa a cay bon cerca un gran parti di comunidad, sinembargo, esaki no a haci mucho pa calma e discusion tocante e situacion.

Conocido ex-miembro di prensa, Arien Rasmijn, a publica varios post riba su cuenta di Facebook cu a ricibi hopi reaccion.

“Hecho ta cu semper tin algo cu por y lo bay robes y esey ta OK tambe, basta hende tuma nan responsabilidad, saca nan som, siña loke tin di siña etc. Te awo loke mi ta wak sinembargo ta … un miedo cu si duna critica, nunca mas un artista grandi lo pone pia na Aruba,” el a comenta. “Hecho ta cu a gasta miyones den e concierto aki y ta bisto awo caba cu e ROI ta negativo. Mirando estado financiero di Aruba y tambe con esnan cu a yuda nos isla cu prestamo tambe ta kijk mee (pa no papia mes di esnan cu ta den tuma over eynan!) mester responsabilisa esaki.”

Ademas, Rasmijn a cuestiona si na Aruba tin e capacidad pa por organisa eventonan asina grandi.

“Hecho ta tambe cu a trece un artista di e caliber cu normalmente bo ta wak na CNSJ pero e promotor – cu tur respet – no tin e peso di un CNSJCNSJ tin e peso y e cartera pa no solamente book un Romeo Santos (of un Juan Luis Guerra, of Prince) pero tambe e size y e modo pa negocia y impone su condicionnan preto riba blanco pa cu cumplimento di e artista y su management. Y si pa un of otro motibo e artista no por cumpli, CNSJ por entama caso despues pa daño y perhuicio y bringa esaki pa añas si mester pa asina protege su inversion y producto.”

“Kizas bo no ta haya husto cu mi ta compara e concierto aki cu CNSJ,” el a continua. “Mi respuesta ta: awel no book un artista di e grandura ey.” Rasmijn ta considera cu “mester haci e pregunta doloroso pa nos mes tambe: hasta si nos ta fit net como tussenstop den e schedule, manera claramente tabata e caso cu Romeo Santos, un concierto asina ta realisticamente ehecutabel na Aruba?”

Pa finalisa, Rasmijn a cuestiona tambe e rol di ATA como sponsor principal, si e autoridad di turismo “ta bay tuma algun tipo di responsabilidad ya cu nan a afloha condicionnan pa sponsor e concierto aki,” alabes puntrando “cua parlamentario tin e cohon pa yama un reunion pa pidi ATA con a para cu e entrada, si a logra metanan poni y pakico a tuma e riesgo aki cu nan budget net prome cu nan aña fiscal a caba?”

Den otro post, Rasmijn ta hala atencion na e hecho cu capacidad maximo pa un evento na Aruba ta dies mil hende, cual historicamente no a alcansa. E ta sugeri pa “scoge y promove artista cu den otro paisnan ta yenando sala di 5-7mil.”

Musico local Rowald de Graaff a reacciona den acuerdo di Rasmijn, agregando cu “Aruba ta demasiado chikito pa atrae artistanan di un tamaño internacional.” El a recorda con “den pasado a invita varios representante/manager pa site inspections y a rechasa Aruba como un destinacion pa inclui den nan tour of duna un concierto off-tour.” El a agrega cu esaki tabata pa motibo cu e venues ta chikito, falta facilidad, logistica, entre otro. De Graaff tambe a cuestiona e sponsor principal: “Acaso ATA no a siña su les cu loke a pasa na 2011 cu Air Supply cu Aruba Summer Music Festival a book ‘supestamente’ y tabata un no-show?

Kico finalmente e concierto di Santos a genera pa Aruba? di e 10 mil bishitantenan ta un mil y pico a bin fo’i exterior contrario na un ASBMF cu ta trece ± 4 mil bishitante cu ta keda 5 a 7 anochi. Ken finalmente tabata fout, mi ta laga esey pa e organisador bay pleita cu e gerencia di e artista.”