A traves di un comunicado di prensa, AZV a anuncia ayera na tur su clientenan cu entrante 1 di januari ta bay tin cambio riba e cobertura di servicio di laboratorio. E entidad a anuncia cu entrante 1 di januari 2024 tur asegurado bao tratamento di specialista medico y cu haya prescricpion pa test di laboratorio por acudi solamente na laboratorio di Hospital of na ImSan.
Director di laboratorio priva, Laboratorio Familiar, Sra. Irene van der Linde, a reacciona a traves di un comunicado tambe ariba e anuncio aki.
“E decision di AZV pa prohibi pashentnan pa bay e laboratorio cu nan kier pa testnan di specialista, incluyendo Laboratorio Familiar, na unda nan ta bayendo pa mas di 37 aña caba, lo afecta nos comunidad inmensamente,” e director a expresa.
El a remarca cu pa añanan largo nan ta sinti cu nan ta keda wordo persigui pa AZV y ya caba nan a yega di a gana tres caso den corte durante añanan 2004 pa 2011 contra e mesun entidad aki, y den e 37 aña cu nan ta brinda servicio, semper a cumpli cu cualkier exigencia cu AZV a bin cune.
“Ora nos a kere cu porfin e persecucion a caba y cu nos por sigui traha na paz, pa nos sorpresa nos a haya un otro anuncio cruel cu AZV cu lo bay prohibi nos pashentnan, cu ta cu nos pa decadanan caba, di haci uso di nos laboratorio pa nan testnan di specialista,” el a enfatisa.
E director di e laboratorio a pidi pa investiga e situacion aki pa asina por yega na e motibo real tras di e decision y accion cu AZV a tuma. “Nos comunidad merece transparencia y un trato husto den cuido di salud,” el a finalisa.
