A detene otro persona pa contrabanda di hende relaciona cu caso di Leidy Johana Salazar

Ayera Cuerpo di Polis a informa tocante e detencion di un persona di nacionalidad Venezolano ken ta envolvi den e desaparicion di e Venezolano, Leidy Johana Salazar segun fiscal di Ministerio Publico a indica den e caso cu a tuma luga na corte di Prome Instancia dia 22 di november ultimo hunto cu otro hende.

Diamars den oranan di atardi Unit Mensenhandel-Mensensmokkel (UMM) a detene un homber di inicial J.L.N. alias ‘Ficky’ di 46 aña y di nacionalidad Venezolano pa contrabanda di hende cu morto como consecuencia.

E departamento UMM ta consisti di recherche nan di KPA y Koninklijke Marechaussee y ta resorta directamente bao di Commisario di Recherche, e comunicado sin mucho detaye tabata indica.

Contrabanda di persona (Mensensmokkel)

Contrabanda di persona, ta un termino usa pa describi circunstancianan unda ilegalmente y di forma organisa ta trafica persona a traves di fronteranan internacional. No solamente e ta castigabel na nivel internacional sino na Aruba tambe, unda e ta hancra den Art. 2:154 di Codigo Penal di Aruba. Den esaki e castigo por varia di 4 aña di prison, multa di categoria 4 te cu 15 aña di prison of multa di categoria 5 si e trafico di persona tin como resultado e morto di e persona.

Ministerio Publico a pidi cinco aña di prison pa e sospechosonan

Dia 22 di november ultimo Ministerio Publico a pidi 5 aña di prison pa sospechosonan R. Laveist, R. Stamper y I. Sarmiento del Ponte pa contrabanda di persona cu consecuencia fatal di Leidy Johana Salazar y contrabanda di Sarmiento del Ponte su yiu muhe na unda cu autoridadnan a haya documentonan di identificacion riba boto ora a coy e boto den beslag.

Segun punto di bista di fiscal, e crimen di contrabanda di Johana cu consecuencia fatal aki a wordo cometi den participacion di e sospechosonan ‘in vereniging’ cu R. Stamper, R. Laveist, Sarmiento del Ponte, Ficky y Segundo unda tabatin planificacion y transaccion financiero na un suma di 2.100 dollar, ademas tabatin ehecucion di e hecho castigabel di contrabanda di persona (Mensensmokkel) cu consecuencia fatal.

Segun Ministerio Publico tabatin planificacion entre R. Laveist y Sarmiento del Ponte pa e fecha cu ta bay trece Johana y e transaccion financiero di 2.100 dollar tabata entre R. Laveist y Ficky y e ehecucion di hecho castigabel ta Segundo ken a transporta Johana for di Puerto Escondido pa topa R. Stamper ken na su turno a transporta Johana pa Aruba.