Ayera 6 di december, hues di LAR a duna veredicto den e caso cu activista Anouk Balentina a entama contra Minister di Husticia y Asunto Social y como tercero DOW, evaluando e decision di e minister pa otorga un hindervergunning na DOW pa e incinerator na Parkietenbos.
Manera lectornan di Bon Dia Aruba por corda, minister di Husticia, Seguridad y Integridad a otorga e hingervergunning den un decision di dia 23 di december 2020. Despues, den un decision riba bezwaar dia 5 di maart 2023, e minister a declara e bezwaar di Balentina tocante e decision como sin base. E ora Balentina a entama un caso dia 14 di april 2023 contra e decision aki di e minister.
A base di e argumentonan entrega pa Balentina, Corte a evalua e permiso (hindervergunning) otorga pa e minister. Asina a conclui cu e minister no mester a otorga esaki, ya cu no por a demostra di manera satisfactorio cu no tin temor di molester di naturalesa grave, daño pa salud of peliger segun ta estableci den articulo 10 di e Hinderverordening.
Hindervergunning
A base di consehonan ricibi pa Directie Natuur en Milieu, Dienst Technische Inspecties y Dienst Brandweer, e minister a dicidi pa otorga e hindervergunning. Esaki pasobra e minister a conclui a base di e consehonan aki cu no tabatin temor di molester di naturalesa grave, daño pa salud of peliger segun estableci den articulo 10 di e Hinderverordening. Segun e minister, si no tin e temor aki, no por nenga e permiso.
Sinembargo, Balentina a bisa cu a prepara e consehonan aki inadecuadamente y no tabata suficiente substancia.
Corte a duna Balentina rason. Segun Corte, den e conseho di DTI, ta indica cu trahadornan a haci tres control durante e fase di test di e incinerator, pero no ta keda cla ki aspecto tecnico di e incinerator mester evalua pa conclui cu no tin peliger. Tampoco a provee e datonan tecnico aki na momento di solicita e hindervergunning. Maske e minister si a splica e detayenan aki den un bijlage, no a keda cla den ki marco DTI a evalua e aspectonan en cuestion. Corte a considera cu e conseho di DTI no ta suficiente base pa conclui cu no tin preocupacion pa peliger manera ta describi den articulo 10 di Hinderverordening.
Pa cu e conseho di Brandweer, Corte a considera cu Brandweer a duna su conseho basa riba articulonan cu ta dirigi mas pa un instalacion unda ta bay opera un hotel, restaurant, club nocturno of casino, mientras cu a duna e permiso pa un sitio unda ta bay opera un incinerator. Pues ta rechasa e conclusion di Brandweer cu no tin motibo pa rechasa e permiso.
Y pa e cu e conseho di DNM, Corte ta declara cu e condicion number 5 den e hindervergunning ta bisa cu no por surpasa e cantidad di emision manera ta poni den e condicion di e permiso. Pero segun Corte, e condicion cu a impone no ta suficiente pa fundamenta cu no tin molester pa salud y daño, principalmente pasobra no a indica a base di kico a dicidi e limitenan. Aruba no conoce su propio guia pa emision pa incinerator. Y maske ta posible pa basa riba guianan di otro pais, no por haci esaki sin splica riba kico a basa e guia y con e ta relevante pa e situacion di Aruba. Ademas, den e documento ta asumi cu no ta bay kima resto di bestia, mientras cu a duna permiso si pa haci esaki.
Ademas, ta cuestiona cu na momento cu DOW a solicita e permiso, no a duna informacion tocante e fuente, composicion, cantidad y concentracion di e emisionnan cu lo resulta for di e kimamento di slib, desperdicio medico y restonan di bestia. E informacion aki ta necesario prome cu e minister por test e emisionnan basa riba e normanan cu ta aplicable, prome cu otorga un permiso.
Asina a conclui cu e consehonan di DTI y Brandweer a keda prepara inadecuadamente y no tabata suficientemente funda. Pues segun Corte, e consehonan aki no por tabata e base pa e minister tuma su decision. Pues e Corte ta exigi pa retira e permiso.
Consecuencia
E consecuencia di e veredicto di Corte ta cu no tin hindervergunning pa e incinerator. Sin un hindervergunning, no por haci uso di e incinerator. E corte ta determina cu e minister mester bolbe evalua e solicitud pa hindervergunning y tuma e decision di nobo, teniendo cuenta cu e sentencia aki.
E minister a indica durante tratamento di e caso cu si no por haci uso di e incinerator, lo mester bay back na e manera di traha anterior, es decir, cu ta kima e slib, desperdicio medico y restonan di bestia riba tera. E opcion aki no ta deseable pa ningun partido. E idea ta pa por bin cu un incinerator lo mas pronto posible cu tin mas capacidad, y cu esaki por ricibi e permisonan necesario.
Balentina tabata di opinion cu e incinerator lo mester bin na otro sitio, algo cu tambe a keda conseha na 2018. Balentina a mustra riba e rapport di e Workgroup Solid Waste Management 2018 y e conseho di 12 maart 2018 cu tema “Advies korte-termijn oplossing Werkgroep Afvalcerwerking.”
Corte no por ni mag pronuncia riba e discusion aki, ya cu ta considera cu esaki ta un discusion politico.
