Diasabra merdia e muchanan di grupo di baile di Kids & Youth in Action Foundation a celebra nan lunch di Pasco na unda nan a pasa un rato agradabel y na mesun momento a reconoce nan miembronan cu mas sobresali den aña 2023.
Kids & Youth in Action Foundation cu ta brinda e hobennan e oportunidad pa practica un actividad na unda na por haci movecion. E ta consisti primordialmente di un grupo di baile di mucha muhe cuminsando desde 4 aña di edad te na hoben adulto.
Durante nan actividad di pasco e directora di e grupo, Sra. Debra Boekhoudt hunto cu e coreografo di e grupo, Raisa Montilla, a duna un reconocemento special na e bailarinanan cu a sobresali den diferente te categoria.
Den e grupo di Mini Kids in Action, e grupo di e bailarinanan mas chikito, e reconocemento pa e bailarina mas disciplina a bay pa Rachel Angela, e bailarina cu miho face expression a bay pa Zhoémy Croes y e overall best dancer, esun cu a resalta den tur aspecto a bay pa Heavenly Croes.
Den e grupo di Pre-Teen in Action, e grupo mediano, e bailarina mas disciplina a bay pa Jadieshah Croes, e bailarina cu miho face expression a bay pa Chouvienne Rodriguez y e overall best dancer a bay pa Kearah Castro.
Den e grupo di Youth in Action, e grupo di mas grandi, e bailarina mas disciplina a bay pa Elizabeth Pantophlet, e bailarina cu miho face expression y overall best dancer a bay pa Ariana Lake.
Coreografo di e grupo, Raisa Montilla, a remarca cu e meta tras di e idea pa entrega reconocemento na e bailarinanan cu mas a resalta durante aña ta pa encurasha no solamente e bailarinanan cu a ricibi e reconocemento pa sigui traha duro, pero tambe pa encurasha e otro miembronan pa duna mas di nan banda durante aña 2024 pa asina nan tambe tin e oportunidad pa ricibi un reconocemento
