Durante conferencia di prensa ayera mainta, IBISA, hunto cu Alhambra Casino, a anuncia apertura di registracion pa e di 38 edicion di Aruba International Half Marathon. Will Erasmus, hefe di departamento di comunicacion y Francis Tromp, coordinador di e careda, a elabora ariba e detayenan di e careda.

Erasmus a anuncia e di 38 edicion di Aruba Internacional Half Marathon hunto cu Alhambra Casino. El a remarca cu e aña aki IBISA ta bay purba di yega mil participante, door di cual a tuma e decision pa habri e registracion mas trempan

E careda ta bay tuma luga dia 10 di maart 2024 y ta cuminsa, manera tur aña, na Joe Laveist Ballpark na San Nicolas y ta termina na Alhmabra Mall. E careda ta cuminsa pa 5:30 di mainta y tin un limite di tres ora pa yega e meta final.

E distancia pa e careda aki ta e distancia cu tin normal pa e half marathon cual ta 21 kilometer, for di San Nicolas pa Alhambra.

Erasmus a sigui splica cu pa e careda aki tin e categoria individual, duo relay na unda dos coredor ta core cada un 10.5 kilometer y nan ta cambia na mitar caminda, y e aña aki nan ta introduci atrobe e team relay di cuater na unda un persona ta cuminsa na Joe Laveist y despues e participantenan ta keda cambia na cada stacion y un coredor ta finalisa na Alhmabra Casino.

Loke e participantenan ta bay ricibi pa e careda aki ta e T-shirt cu nan ta ricibi normalmente, nan bib cu number di chip, nan ta haya un medaya di participacion na final di e careda y ta bay tin fruta cu bebida durante y na final di e careda.

El a agrega cu ta bay tin diferente premio pa e International Half Marathon. Ta bay tin premio cash pa e ganador individual, muhe y homber, ta bay tin premio cash tambe pa e ganador overall local, muhe y homber y ta bay tin gift card pa e duo relay prome luga, duo di muhe, homber y mix, y ta bay tin premio tambe pa e team di cuater relay.

Ta bay tin diferente premio den e diferente categorianan. E participantenan cu lo ricibi premio, e top tres overall homber y muhe, y local overall muhe y homber, ta e top tres den categorianan 17 pa 24 aña, 25 pa 29 aña, 30 pa 34 aña, 35 pa 39 aña, 40 pa 44 aña, 45 pa 49 aña, 50 pa 54 aña, 55 pa 59 aña y 60+.

Francis Tromp, coordinador di e Aruba International Half Marathon, a splica cu cada categoria tin un costo di participacion, pa local y internacional. Pa coredo individual y pa cada coredo den un duo relay, e costo di participacion ta 45 florin pa local y 30 dollar pa internacional. Pa e Open Team Relay e prijs ta 180 florin pa cuater persona den e team y prijs pa internacional ta 100 dollar pa team.

Pa loke ta registracion pa open team, e ta un proceso na unda e team mester scohe un lider y e lider aki tin cu zorg pa registra, haci pago y busca pakete pa full e team. Den caso cu na caminda tin cambio den e team, solamente e lider tin e autorisacion pa haci e cambionan aki.

Registracion lo cera dia 8 di maart 2024, of prome si logra yega na e cantidad limite di 1000 participante. Entregamento di T-shirt y bib lo tuma luga dia 9 di maart na Alhambra Casino.

Tromp a indica cu tambe ta bay tin bus disponible e dia di e careda pa transporta e participantenan for di Alhambra Casino pa Joe Laveist Ballpark. E prome bus lo ta saliendo for di 4or di mainta y ultimo bus lo sali 4:30 di mainta. Tambe ta bay tin bus pa e ekiponan di relay, e bus lo transporta e coredornan y lo keda stand by pa asina transporta e otro coredornan ora nan yega e relay point back pa Alhmabra.

Hefe di Marketing di Alhambra Casino, Annie Dirksz, a remarca cu pa Alhambra Casino ta un honor un biaha mas pa uni IBISA pa realisa e Aruba International Half Marathon.

“Pa nos semper ta un honor. Aunke nos ta un casino cu ta den entretenimento, toch semper nos ta coopera cu deporte y tambe nos ta yuda hopi cu fundacionnan pasobra na final nos ta ricibi y ta bon pa nos duna back,” Dirksz a resalta.

Por ultimo Dirksz a extende su invitacion na pueblo di Aruba y tur coredor pa inscribi y participa den e Aruba International Half Marathon.