Y tin preocupacion pa ‘contradiccion’

Investigadornan na Aruba a cuestiona si e confesion escalofriante haci pa e sospechoso principal den asesinato di Natalee Holloway ta creible, declarando cu tin algun detaye cu no ta klop. Fiscalnan a bisa cu e admision di Joran van der Sloot tocante e asesinato na 2005 di e estudiante di scol secundario ta contene contradiccionnan cu “no tin sentido.”

Esaki segun un articulo exclusivo di noticiero online, The Messenger.

Ora Van der Sloot a confesa den detaye tocante e asesinato na 2005 di Natalee Holloway, su famia a haya un sentido di clausura. Pero autoridadnan na Aruba ainda ta haya dificil pa compronde loke nan ta bisa ta aparente contradiccionnan den su storia – y cuestionando si parti di nan ta creible.

“Tin cosnan cu djis no tin sentido,” segun un investigador na Aruba kende a traha riba e caso na 2005. “E no ta klop,” el a bisa The Messenger.

Van der Sloot, awo di 26 aña di edad, a admiti di a bati Holloway morto cu un bloki riba un beach na Aruba despues cu el a rechasa su avancenan sexual despues cu nan a conoce otro tempo cu Holloway tabata riba un trip cu su examenklas na e isla.

Van der Sloot a bisa cu despues el a lastra e curpa sin bida di Holloway, y a bent’e den awa cu tabata yega te na su rudia y a bay cas, segun el a bisa den un entrevista graba riba dia 3 di october cu a keda publica pa oficialnan Mericano despues cu el a admiti culpabilidad pa fraude y extorsion.

E revelacion a parce di pone un fin na un misterio di 18 aña.

Tambe a pone polis di Aruba den berguensa, segun un fuente cu a admiti na The Messenger, “un adolescente a tuma nos haci.”

Pero por ta posible cu Van der Sloot – kende a admiti di a ricibi tratamento pa “tendencia sociopata” – a gaña tocante aspectonan di morto di Holloway manera e investigador Arubano ta sugeri?

E confesion tabata parti di un acuerdo cu a permiti Van der Sloot evita un huicio na Merca pa un schema di extorsion na 2010 den cual el a pidi famia di Holloway placa a cambio di informacion tocante con e adolescente desaparecido a muri y unda e tabata dera.

Cu speransa di verifica su declaracion, oficialnan Mericano a administra un test di poligrafo, puntrando tocante detayenan specifico den su confesion. Nan a bisa cu el a pasa e test – pero pa esnan cu a traha riba e investigacion, duda ta keda.

E pregunta di mas grandi, segun e oficial Arubano: Si curpa di Natalee a wordo benta den awa no profundo, pakico e no a flota back riba beach?

“Ta berdad cu tin un reef cu usualmente ta tene cosnan for di bay leu den lama,” e investigador ta bisa. “E ta como 30 meter leu di costa. Bo mester pas’e pa sigura cu cosnan no lo flota bin back riba beach. Pero e ta bisa cu e no a haci esey.”

Adicionalmente, autoridadnan Arubano a realisa un buskeda riba e mesun beach e dia despues cu Van der Sloot ta bisa cu el a asesina Holloway brutalmente cu un bloki – y no a haya nada.

“Nos no a mira ningun bloki,” e investigador ta bisa. “No tabatin sanger ni nada cu a conduci nos na pensa cu el a muri di e forma ey na e lugar ey.”

Tambe tin otro version di e storia di Van der Sloot tocante kico a pasa despues cu Holloway a fayece, cu ta contradeci loke e ta bisa den su confesion.

Den un email cu el a manda na un amigo na 2010, cual The Messenger a mira, Van der Sloot a bisa cu su tata, Paulus, a huur un boto dos dia despues pa “take care of things” – implicando cu inicialmente nan a sconde e curpa di Holloway y despues a bent’e mas leu den ocean. E e-mail a ser manda na un persona yama “David G.” for di e-mail di Yahoo di Van der Sloot.

Sea cu nan ta kere Van der Sloot awo of no, autoridadnan di Aruba no por habri back e caso contra dje pa motibo di un fecha limite di 12 aña.

“No tin nada mas cu por haci,” e investigador a bisa. “Pero ami semper ta bay keda cu e duda.”

Pa famia di Holloway, sinembargo, tin consuelo den scucha su asesino confesa duna detaye riba con el a muri. “Mi tin alivio,” su mama, Beth Holloway a bisa pafo di e corte na Alabama despues cu Van der Sloot a admiti culpabilidad na october. “E confesion aki ta nifica cu finalmente nos a yega na e final di e pesadiya sin fin aki.”

E confesion completo di Van der Sloot:

“El a pidi pa bay back na su hotel pero ami tabata djis purbando pa nan baha mi un tiki mas leu di su hotel pa asina nos por cana bay back y mi lo por a haya un chens pa ta cune ainda. Esey tabata loke mi tabata spera.

“Deepak a baha mi na otro lugar, un tiki rechts di hotel Marriott conoci como Fisherman’s Hut. E lugar aki no ta leu di, bo sa, e siguiente hotel ta e Marriott, y e siguiente hotel despues di esey ta un otro Marriott cu ta un timeshare. Y despues tin e Holiday Inn. Nos a cana banda di beach.

“Deepak y Satish ta bay. Nan ta bay back cas, asumi cu nan a bay back nan cas. Nan a subi nan auto y a bay.
Ami ta keda cu Natalee canando riba beach. Mi a haya un espacio prome cu nos yega na hotel Marriott, unda mi a pon’e drumi abao, nos a drumi hunto riba santo y nos a cuminsa sunchi otro. Mi a logra pa e sunchi mi atrobe y nos a cuminsa sunchi otro.

“Mi a cuminsa mishi cune atrobe y el a bisa mi no. El a bisa mi cu e no kier pa mi mishi cune. Ami ta insisti. Mi ta keda mishi cune toch. Na final el a dal mi cu su rudia memey di mi pia. Ora el a dal mi cu su rudia memey di mi pia, mi a lanta y mi a scop e extremadamente na su cara.

E ta drumi abao inconsciente, posiblemente hasta morto, pero definitivamente inconsciente. Y mi ta mira banda di dje tin un bloki grandi riba e beach. Mi a coy esaki y mi a bati su cabes cune completamente. Su cara basicamente ta collapse den otro.

“Despues, mi no sa exactamente, mi tin miedo. Mi no sa ki pa haci. Mi ta dicidi pa pon’e den ocean. Pues mi a gar’e y mi a mita hal’e y mita cana cune den ocean. Mi a push’e aden. Mi a cana te cu e ocean tabata na mi rudia, y mi a push’e bay den lama. Despues di esey mi a sali. Mi a bay cas.”