Ayera tardi, a traves di un conferencia di prensa, Minister di Husticia y Asuntonan Social, Rocco Tjon, a anuncia cu Cuerpo Policial di Aruba (KPA) ta prepara pa aumenta accion y nan visibilidad den luna di december pa trece seguridad den trafico.
Pa loke ta e situacion di trafico na Aruba, Minister Tjon a remarca cu no ta un secreto cu Aruba ta conoce hopi accidente di auto, pero a base di cifranan, el a indica, cu esaki ta stabiel den un manera di bisa, pero toch esaki ta demasiado.
Pa e motibo aki, el a indica, el a reuni cu alto comisiario suplente, sra. Candelaria, y ayera mainta el a reuni cu Alto Comisario, Sr. Arnhem, y asina a tuma e decision cu ta bay aumenta e visibilidad di parti di Cuerpo Policial pa e luna aki di december.
Ta bay tin mas presencia di polis, ta bay percura pa mas personal na cierto unidadnan, pa asina na un forma agil por KPA por atende cu e diferente situacionnan, entre otro di trafico riba caminda.
“Di otro banda nos ta haci un yamada, un apelacion na nos comunidad pa ta hopi mas cauteloso den trafico. Tuma bo propio medidanan di seguridad pa evita cu bo ta haya bo den un accident,” el a resalta.
Minister Tjon a informa cu e siman aki mes Cuerpo Policial ta bay lansa nan campaña di prevencion pa loke ta luna di december, mirando cu ta conoci cu luna di december toch ta mas druk cu e otro lunanan.
Na mesun momento, e mandatario a anuncia cu otro aña gobierno ta bay enfoca ariba seguridad den trafico como un di e pilarnan for di maneho di husticia. El a informa cu nan ta bay lansa un campaña nacional otro aña pa loke ta trata eleva seguridad den trafico.
El a indica cu mas detaye di e campaña aki lo ser anuncia na inicio di otro aña, pero el a remarca cu a haci e anuncio aki di aworaki caba mirando cu e topico di seguridad den trafico ta un preocupacion grandi cu ta reina den comunidad di Aruba.
“Cu e diferente medidanan cu lo ser introduci otro aña, lo aborda e parti di seguridad den trafico,” el a enfatisa.
