(AP) – Bitcoin un biaha mas ta hayando su momento. Riba dialuna, e criptomonedamas grandi na mundo a subi 41,000 dollar pa prome biaha den casi un aña y mey y a marca un aumento di 150% e aña aki.
Bitcoin a subi for di net mas cu 5,000 dollar den e comienso di e pandemia te na 68,000 den november di aña 2021 segun FactSet, un periodo marca pa un aumento den demanda pa productonan tecnologico. Prijsnan a baha back durante un serie agresivo di aumento di tarifa cu e meta di controla inflacion y despues e colapso di FTX a tuma luga, cual ta un di e companianan mas grandi den criptomoneda.
Ora cu 2023 a cuminsa, un solo Bitcoin tabata menos di 17,000 dollar despues di a perde mas cu 75 prociento di su balor. Inversionistanan sinembargo, a cuminsa subi back den cantidadnan grandi ora inflacion a cuminsa regula. Y e colapso di banconan prominente cu ta enfoca riba tecnologia a causa cu mas inversionista a cuminsa inverti den criptomoneda mientras nan tabata sali for di Silicon Valley.
E personanan cu ta boga pa e industria ta bisa cu e manera nobo di inverti den bitcoin por haci mas facil pa cualkier persona por drenta e universo di criptomoneda mientras ta baha algun di e riesgonan documenta cu ta asocia cu inverti den criptomoneda. Reguladornan anteriormente a rechasa bitcoin su aplicacionnan pa ETF, sinembargo recientemente managernan di fondo di criptomoneda su victorianan a mehora e chens di por ricibi un aprobacion, posiblemente pa proximo luna caba.
