Venezuela: Resultado di referendum ta aumenta cuestionamento di CNE

(ElNacional) – E resultado anuncia di e referendum consultivo di e teritorio Esequibo ta aumenta e dudanan ariba e transparencia di e Consejo Nacional Electoral (CNE), den e prome evento organisa bao e presidencia di e inhabilitador Elvis Amoroso, expertonan a considera den un entrevista cu La Voz de America.

E politologo Jesus Castellanos a bisa na e medio digital cu e CNE ta ariesga na compromete su ya caba fragil confiabilidad ainda mas door di presenta un cifra cu ta contrario na e percepcion di ausencia. El a agrega cu ainda trempan diadomingo e organismo a bisa cu e participacion tabata tres biaha mas hopi cu otro votacionnan.

El a señala cu a duna un extension di dos ora den e jornada di votacion, a pesar cu no tabatin rapport di diferente votadornan den e mayoria di e centronan di votacion na e pais.

Y el a recorda cu a permiti pa e Partido Socialista Unido de Venezuela instala e asina yama “puntonan cora” cerca di e centronan pa incentiva e electornan pa vota pa e opcion “SI” den e cinco preguntanan cu tabata ser puntra pa e autoridadnan.

“No solamente e regimen a keda mal para, pero tambe e institucionalidad electoral den su prome accion formal,” Castellanos a afirma.

“E resultado aki ta sobrepasa cualkier expectativa. Ni e vision mas optimista lo por hiba na tanto,” e politologo Doriam Gonzalez a agrega. E ta premira cu tanto Nicolas Maduro como tambe esnan mas cerca di dje ta bay usa e resultado aki pa eherce un mandato di soberania cu ya ta estableci den e Constitucion.

E experto a destaca cu e proceso consultivo no a lanta e interes den e ciudadanonan y cu tampoco lo aporta hopi na e politica real di e pais pa defende e teritorio den disputa cu Guyana. Di mesun manera, el a bisa cu e chavismo a demostra un capacidad limita di mobilisacion y un control politico abao durante e referendum.

E politologo Jesus Castillo Molleda a expresa cu e proceso a dividi e oposicion pa loke ta trata participacion den e proceso. Algun lider si a participa, entre otro Henriue Capriles, ex gobernador di estado Miranda y Manuel Rosales, gobernador di estado Zulia.

Maria corina Machado, ganadora den e eleccion primaria cu mas di 90% di respaldo, a dicidi di no vota. El a enfatisa na varios ocasion cu e soberania di Venezuela no mester wordo consulta, pero mester wordo eherce.