Gobierno di Aruba, representa pa Minister di Transporte, Integridad, Naturalesa y Asuntonan di Adulto Mayor, minister Ursell Arends ta firma un Memorandum of Understanding (MoU) cu Xavier University School of Veterinary Medicine (XUSOVM), Aruba. E meta di e colaboracion aki ta pa fortalece e esfuersonan den agricultura, cuido di animal y cuido veterinario a base di un intercambio di conocemento.
E colaboracion ta cubri varios area, incluyendo:
– Mehoracion di educacion y investigacion veterinario;
– Garantisa bienestar di animalnan y salud publico;
– Mehoracion di cuido veterinario y servicionan di cuido pa animal;
– Enfoke ariba un intercambio di conocemento y perspectivanan entre Gobierno di Aruba y XUSOVM.
E partnernan ta plania pa aborda problemanan manera cacho y pushi di caya, control di malesa, y practicanan di cria. E iniciativa aki tambe ta provee oportunidadnan di aprendisahe pa studiantenan di veterinaria na entre otro Departamento di Agricultura, Cria y Pesca. Tambe, lo conduci investigacionnan y establece obhetivonan specifico cu lo wordo evalua y actualisa regularmente.
Ambos partner tin coordinadornan apunta cu lo ta responsabel pa e ehecucion eficaz di e actividadnan. Lo tene reunionnan regularmente pa planifica y ehecuta esfuersonan colaborativo, cu evaluacionnan semi-anual pa asina sigura progreso cu ahustacionnan necesario.
Minister Arends ta expresa optimismo ariba e desaroyonan aki bisando cu “E colaboracionnan aki ta un paso significante pa mehora cuido di animal na Aruba y e sector primario. Nos ta sigur cu esaki lo tin un impacto positivo na nos comunidad”.
