Aruba y hopi otro pais rond mundo ta participa na e 16 dianan di activismo dedica na concientisacion di violencia contra hende muhe. Pa trece mas atencion ariba e dianan aki y participa tambe na e campaña importante aki, Mervine Kock, un atleta profesional di bodybulding, a bin cu e iniciativa pa realisa un proyecto di photoshooting enfoca ariba e diferente generacionnan di hende muhe den e mundo di fitness y bodybuilding.

Den un entrevista cu Bon Dia Aruba, Kock a splica cu e proyecto di photoshoot ta encera seis difernet hende muhe, di diferente edad, generacion di 60 aña, 50 aña, 40 aña, 30 aña y esun mas jong di 20 aña, cu ta competi den e mundo di bodybuilding of cu ta activo den e mundo di fitness.

Algun di e muhenan aki ta mama, ta traha, ta bay scol y ta dedica nan tempo tambe na e deporte y e disciplina di bodybuilding. “Nan ta mamanan cu ta maneha tur tres cos pareu y si nan por logra nos tur or logra,” el a remarca.

El a indica cu e meta di e poryecto aki ta pa mustra e muhenan den comunidad cu aunke nan por tin yiu, ta casa of kico e stiuacion por ta, nan por adapta nan tempo pa asina nan por practica e deporte of pasion cu nan tin.

“No ta pasobra cu bo tin yiu bo mester keda sin train. Ta hopi importante pa e hende muhe sigui enfoca ariba nan pasion y traha tempo pa nan mes pa nan sigui disfruta di nan bida, haci loke cu nan kier, no wordo controla door di ningun hende, pasobra tin hopi violencia ainda bao di hende muhe, cu nan casanan ta controlanan etc.,” Kock a resalta.

El a splica cu e ta agradecido cu e tin suerte cu el a biba den un cas unda nunca tabatin violencia y unda nunca el a wak su tata dal mi mama of papia malo cune. Aworaki como adulto cu tin 42 aña casa, nunca su casa a stop e di haci nada. “E no ta controlami y mi ta liber pa haci loke mi kier pa mi disfruta di mi bida y di mi parti mi tambe ta lage disfruta su bida,” el a indica.

El a agrega cu un pareha no por controla otro pasobra esey ta trece hopi malcontento den un relacion y si un relacion cuminsa sin repset pa privacidad di otro, e relacion no ta bay ta bon ni sano pasobra niun di dos persona ta bay tin paz mentaly esey ta hopi importante, sobre todo den e deporte di bodybulding.

Kock a splica cu den e deporte aki e atletanan mester desecansa bon, mester come na tempo, come segun e plan di alimentacion y hasta den temporada di offseason, cual ta na e momentonan aki pasobra no tin competencia, e deportistanan ta mantene nan plan di alimentacion, pero ta train duro pa gana masa muscular.

Otro punto cu el a menciona ta cu e hende muhe mester train y come diferente na un hende homber cu tambe ta practica e deporte aki. Esaki primordialmente ta pa motibo cu hende muhe no tin nivel di testosterona halto, pero awendia tin testosterona natural cu por yuda e hende muhe pa tene su masa muscular.

Den su caso personal, na su edad e mester usa un tiki di e testosterona aki pasobra despues di menopausa e nivel di testosterona ta baha full den e hende muhe y esaki ta haci cu e ta perede masa muscular.

“E ta un deporte cu ta rekeri hopi disciplina, hopi consistencia, bo mester keda tur dia mesun cos, tin biaha e rutina por fadabo, vooral di e cuminda cu tur dia ta mescos, pero e motivacion mas grandi ta cu bo ta wak e resultado. E resultado tey y bo curpa ta keda bon. Mi tin 67 aña y mi curpa ta hopi bon, pero tur esey ta bin cu trabao duro, come bon, paz mental y ta alegre,” el a enfatisa.

Kock su meta ta pa motiva mas hende muhe eyfo pa drenta den e mundo di fintess. No necesariamente pa competi pasobra competencia no ta pa tur hende y pesey den e proyecto aki el a inclui dos muhe cu no ta competi pero cu ta train duro y cu a haci algo cu nan ta gusta, cu ta nan pasion.

El a indica cu cientificmante ta proba cu e unico deporte cu ta mantene un hende jong y ta wanta e conidicion ta peso, aunke tin hopi hende ta bisa cu na un edad grandi un persona no por hisa peso mas, locual el a señala no ta berdad. “Mi tin rolemodelnan di 80 y 90 aña cu mi ta sigui y nan ta mustra 20 aña mas jong,” el a agrega.

 

Pero tin biaha a pesar di e consistencia y regimen di cuminda y training, na caminda por tin situacionnan cu ta for di man cu ta resulta cu mester haci cambio di habito di come of train. Kock a conta cu aworaki e ta cambiando pa un alimentacion vegan pasobra e ta hayando hopi problema door cu e ta come hopi pisca y pisca tin hopi mercurio y hopi otro cos aden. Esalo ta nifica cu e mester haci cambio di alimentacion y awroaki e mester baha man y bay un tempo vegan pa wak con esey ta bay.

“E partinan ey ta e partinan hopi mas dificil cu no ta den bo man, pero bo mester adapta y bo forsa mental mester tey pasobra esey ta hopi importnate. Si bo no tin forsa mental, bo no ta yega leu,” el a remarca.

Otro meta di e proyecto aki ta concientisacion di violencia contra hende muhe. Kock a splica cu awendia tin hopi hende muhe cu ta sufri di violencia y esey, el a señala, ta algo cu tin di haber cu educacion. El a remarca cu e violencia mester wordo monitorea y e hende muhe mester siña tambe pa no laga ningun homber control’e ni mishi cun’e

El a agrega tambe cu e mama, pasobra e mamanan ta educa nan yiu homber, mester educa nan yiunan homber cu nan no mag di mishi cu yiu muhe di otro hende y e muhe no mester mishii cu e homber, e ta un respte mutuo tambe cu mester tin.

“E muhe no ta un escclavo, un cos pa dal, ni nada, si bo ta busca un hende muhe como pareha, bo mester respete. Ainda nos ta biba den un mundo unda tin hopi machismo unda hende homber ta kere cu nan por controla e hende muhe, pero e muhe a evoluciona y a bira independiente y eynan e problema ta sinta, e hende homber no kier evoluciona y acepta cu e hende muhe a desaroya emocionalmente y financieramente y ya no ta depende mas di hende homber,” el a enfatisa.