Den un combersacion recien cu parlamentario independiente y fundador di partido Lucha pa Reforma, Ryçond Santos do Nascimento, el a destaca e structura coruptivo di e partidonan politico tradicional riba Aruba, y su impacto riba economia y finanzas di nos pais.
Economia coruptivo rond di campaña politico
Santos do Nascimento ta splica cu MEP y AVP, pa nan por financia e tamaño di e partido, pasobra ta partidonan hopi grandi, mester hopi placa. “E ora loke bo ta wak ta ful un economia ta surgi rond di e partido. Parti di e economia ey ta fraudulento, coruptivo. Si bo ta wak por ehemplo e caso di Paul Croes, locual bo ta wak ta ful un negoshi rond di ontheffing di e arbeidsmarkttoets. Si bo ta wak e caso di Benny [Sevinger], bo ta wak ful un economia ta surgi rond di otorgamento di opcion riba terenonan comercial.”
Tambe por nota un linea entre partido y medionan di comunicacion. “Hopi interesante den esaki ta e presencia di sra. Leoncita Arends, cu ta un persona cu ta hopi prominente den e campaña di AVP como cu e tin acceso na platforma radial. Nos a wake recientemente tambe den e investigacion di caso Flamingo, bo ta wak e Sr. Hans Geerman, mesun tipo di construccionnan. Y esaki ta dos caso cu mi ta menciona nan pasobra nan ta claramente den investigacion penal. Pero locual bo ta wak ta cu tin un economia ta surgi rond di un partido y tin di haci cu financiamento di e campaña politico,” segun Santos do Nascimento.
Economia coruptivo ta beneficia di servicio deficiente
Segun Santos do Nascimento, tin otro parti di e campaña aki, y esey ta e parti di dunamento di trabao. Anto esey ta un di e problemanan pakico nos tin un aparato gubernamental asina grandi, pero ora cu bo mester di un servicio, e servicio ta pesimo. “Bo ta pidi un permiso, e ta tarda un siglo pa bo haya un permiso. Bo ta pidi opcion pa un tereno cu un erfpacht di un tereno, tambe un caminda di cruz hende ta cana. Pero si bo ta acerca e minister, e ora cosnan por cambia. Anto esey ta elementonan coruptivo den e sistema. Y e ora pa nan por keda na poder, no ta cumbini pa tin hopi supervision for di Hulanda.
“Si bo ta wak durante campañanan, tin hopi hende tin e speransa cu ora cu AVP sinta, nan ta bay tin un trabao. Y e partido ta fomenta esaki tambe. Bo ta wak cu e trabaonan den gobierno ta wordo usa como manera pa paga e activista y paga e ‘pegador di bandera’, e campañador. E ta similar na locual nos ta wak den e caso di Hans Geerman, cu ta wak claramente un construccion unda esnan cu ta fiel na sostene e politiconan ta haya un beneficio. Nos a wak esey cu Sra. Leoncita Arends, mescos. Esnan cu ta yuda e partido avansa su mensahe, mercadeo, etc. ta haya un ‘fix’.
Ademas, segun Santos do Nascimento, tabatin tres momento clave e aña aki cu a demostra cu partido AVP no tin compromiso cu integridad. “E prome ta, nos tabatin e caso di Paul Croes a bay te na Cassatie, te na Hoge Raad na Hulanda, esey tabata na februari. E partido mester a tuma e momento ey pa bisa ‘bo sa, den nos seno cosnan a bay robes. nos ta bay tuma medidanan pa e tipo di cosnan asina no por ripiti nunca mas den partido’, anto bin cu medidanan serio y cu pueblo por mira cu e partido tin un compromiso cu integridad, no solamente ora ta punta dede riba MEP, pero tambe ora ta wak den cas mes.
“Dos, na maart tabatin un reunion publico encuanto e contract cu Sr. Eddie Briesen a cera cu e compania Lee Tofanelli, anto durante e reunion publico, tabatinun kiebro den partido AVP. Ami mes tabata hopi involucra den esey, pasobra mi a duna mi discurso criticando e manera con Sr. Briesen a cera e contract, pasobra tabatin consehonan contrario di ATA, y despues tabatin CAD cu a cuestiona si e forma con a cera e deal aki ta di acuerdo cu nos ley di comptabilidad. E gran problema ta cu number dos riba partido, Sr. Mike de Meza, a sali y el a defende Sr. Briesen den e reunion. Locual mi a haya hopi malo ta cu Sr. De Meza a bisa durante e reunion ey, y el a clarifica pa su mañan na un programa radial, cu el a haya un negatief cassatie advies, siendo cu e cassatie advies ta positief. Kiermen el a sali, y el a gaña. Partido sa, y e motibo cu tur hende sa ta cu mi mes a ripitidamente mustra cu esaki ta un mentira, despues e documento a circula den comunidad, tur hende por a mira cu e ta un mentira. Y atrobe partido AVP a keda silencioso riba esaki, y a dicidi di keda para na banda di e posicion di Mike de Meza.
“E di tres momento pa partido AVP e aña aki tabata e sentencia di Benny Sevinger, 14 di april. E ta un momento, mi ta haya, hopi tristo den nos historia, cu un partido ta celebra un condena. E celebracion a tuma lugar dilanti cas di partido. A engaña pueblo – eynan bo ta wak claramente cu e partido ta pensa cu pueblo ta bobo, anto cu pa motibo di ignorancia nan por bisa kico nan kier.”
Ademas di esaki, Santos do Nascimento ta haya cu e manera cu a hacie tabata hopi peligroso, pasobra a critica henter e cadena hudicial, unda a hasta acusa un hues di comete acto corupto.
“Y hopi hende no a ripara cu ta esey nan a haci, pero Sr. Mike Eman a bisa cu mester a duna Sevinger algo di un castigo pa scapa cara di Ministerio Publico. Kiermen no a castiga Sevinger pasobra e ta merece, sino a castiga Sevinger pasobra hues cu OM ta haciendo un wega hunto. Y Sr. Benny Sevinger a ripiti esaki.”
Pobresa ta consecuencia di corupcion
E problema di e sorto di retorica manera menciona, ta cu ta normalisa corupcion na e pais. “Locual e ta haci ta mina bo estado di derecho, y e ta normalisa un acto cu nos no mester acepta den un pais. Anto e consecuencia – esey hopi hende ta lubida – ta cu bo pais nunca por progresa. Nos a papia di e proceso di permiso con hopi nan ta tarda. Wel, ta pasobra e ta cumbini un sistema corupto pa e procesonan ey no funciona. Pero alabes, locual hopi hende no ta compronde ta cu si por ehemplo un comerciante mester di un permiso, y e ta warda un, dos aña pa haya un permiso, actividad financiero, economico, ta keda stanca, y bo pais no ta crece financieramente, economicamente. Kiermen tin impacto na final di dia e ta crea y ta causa pobresa. Esey ta su consecuencia. Y esey nos sa no solamente di Aruba, pero con e ta algo cu den tur pais no sa cu esey ta e consecuencia di corupcion.”
