Aña pasa, Bon Dia Aruba a skirbi un articulo tocante un tip anonimo cu a drenta nos mesa di redaccion informando cu e hotel Barcelo Aruba ta kitando e palapanan situa riba beach dilanti nan hotel poco poco y ta reemplasa esakinan cu palonan di coco. Recientemente nos mesa di redaccion a bolbe ricibi informacion for di un turista cu a expresa su opinion y malcontento pa cu e situacion di e palapanan di e mesun hotel aki.

E articulo publica aña pasa ariba dia 26 di december 2022 titula “Confusion y Conmocion pa palapanan dilanti hotel” ta toca e tema aki cu a ser treci na nos atencion.

Henter e situacion e momento ey a trece hopi confusion y diferente reaccion di parti di turistanan como di hendenan local, ya cu e beachnan na Aruba ta publico, y no ta pertenece na ningun hotel. Por lo tanto palapanan ariba beach tambe ta wordo considera publico y pues por wordo usa pa cualkier persona cu yega prome.

Mirando e reaccion cu e situacion aki a causa ariba rednan social e momento ey, Barcelo Group a publica un texto ariba nan cuenta oficial di Facebook, adresando e conmocion rondonando e topico aki.

“A yega na nos atencion cu tabatin discusionnan tocante e situacion di reservacion di stoel y palapa despues di un publicacion ariba rednan social. Gerencia di Barcelo Aruba kier clarifica cu e cantidad di stoel y loungers cu tin rond di pool actualmente ta mas hopi compara cu añanan anterior. Unico cos cu nos ta purba haci ta mehora e aspecto y haci e area di pool y hardinnan cu ta rondona esaki mas agradabel y lo mas facil cu por desde cu Barcelo Group a adkiri e propiedad”, e publicacion ta indica.

E publicacion ta enfatisa cu sinembargo pone mas stoel of loungers den e areanan aki ta bay contra e guianan di seguridad estableci pa autoridadnan local ya cu den caso di emergencia tin dos punto di encuentro y un di nan ta beach y pa mantene e area sigur pa un evacuacion eventual, e hotel no por pone mas mueble.

“E obhetivo di administracion semper tabata mantene e beach mas natural posibel y mantene e aspecto natural alrededor teniendo na cuenta e medio ambiente. Barcelo Group semper a respeta naturalesa y ta comprometi na mantene e terenonan limpi como tambe causa dañonan limita na beach, pasobra pa nos e sostenibilidad ta un di nos propositonan mas grandi”, nan a remarca.

Den e publicacion gerencia di e hotel ta señala cu e tema di palapanan ta un punto di discusion pa algun aña caba y pa evita cu esaki lo continua e hotel a dicidi pa elimina e palapanan y planta palo di coco na nan luga.

“Barcelo Aruba ta e unico propiedad di Barcelo Group cu tin palapa riba beach y esaki ta bay contra di nos standard. Por lo tanto nos lo ta kitando e palapanan gradualmente na medida cu nan deteriora y nos lo planta palo di coco pa brinda e sombra necesario pa tapa solo. Semper nos tabata cla y consecuente cu e politica aki y e aviso poni ariba beach for di momento cu e hotel a bira Barcelo ta demostra esaki”, nan a subraya.

Recientemente un turista a bolbe acerca team di Bon Dia Aruba pa asina expresa su opinion y malcontento pa loke ta trata e situacion di palapanan di Barcelo Hotel cu ainda ta andando.

Segun e turista aki ta menciona, Barcelo a priminti cu nan no lo kita ningun palapa, solamente den caso cu e palapa ta cay of ta insigur nan lo kita esaki. Pero a pesar di esaki, e turista a indica cu tin palapanan ta ser kita den mita di anochi, aunke cu nan ta den bon estado.

Ademas el a remarca cu Barcelo tin mita di palapanan cu ta resta reserva pa doñonan di timeshare y ta pone e aviso di reservacion riba esaki. “Palapanan ta habri pa publico, esaki ta violando e politica di playa publico di Aruba,” e turista a resalta.

E turista a inclui tambe un video di con trahadornan tabata kitando e palapa grandi cu Barcelo tabatin riba beach.

Señalando e mesun hecho aki tambe, algun dia atras ariba Facebook un turista a publica algun potret di e mesun palapapa grandi aki cu trahadornan tabata kitando. E publicacion aki a ricibi mas di 125 comentario di diferente usuario, den su mayoria turista, na unda algun a expresa cu nan no tabata di acuerdo cu e kitamento di e palapanan y algun otro no tabatin problema cu e cambio di palapa pa palo di coco.

“Den mi opinion, e ta un decision malo pa negoshi. Tin hopi competencia pa e turistanan cambia y nan kier palapa. Palapa no solamente ta duna sombra, pero tambe refugio durante yobida. Un inversion chikito den Palapa lo trece mas turista. Awor ta dificil pa haya un lugar na e pool piscina, stoel bao di paraplu ta bay hopi lihe mainta, lagando e beach como e unico opcion. Management mester scucha su clientenan. Ohala nan ta lesa postnan ariba Facebook. Mi lo odia move mi negoshi pa Hilton,” un turista a comenta.

“Masha tristo. Tur resort cu ta rondona Barcelo tin suficiente palapa pa hende no mester baha 5or di mainta pa haya uno. Mi ta gusta e conveniencia di all-inclusive, pero e falta di palapa ta fastioso. Aunke mi ta corda cu algun di e palmanan ta duna sombra. Pa un famia di 4 of 5 persona no ta asina facil pa haya sombra adecua for di e palmanan chikito cu nan ta planta. Tin suficiente luga bon pa come na un distancia chikito for di Palm Beach, asina cu tin un palapa ta cambia e balansa pa keda na un otro luga,” otro turista a indica.

Otro turista a cuestiona na unda e placa di contribucion pa mantenemento ta bayendo e ora. “Unda e placa di mantencion cu nos ta paga ta bay? Pasobra mi no ta mira hopi mehoracion ta wordo haci!”